Германийә кишилик һоқуқ тәшкилати баш министир меркелни хоңкоң вә лагерлар мәсилисидә хитайға бесим ишлитишкә чақирди

Мухбиримиз әркин
2019-09-02
Елхәт
Пикир
Share
Принт

«Тәһдит астидики хәлқләр җәмийити2 «‏-сентәбир күни баянат елан қилип, германийә баш министири ангела меркелни 6‏-сентәбир башлинидиған хитай зияритидә хитайға хоңкоң вәзийити вә уйғур районидики лагерлар мәсилисидә бесим ишлитишкә чақирди.

Хитай таратқулириниң ашкарилишичә, ангела меркел 6-сентәбир вә 7‏-сентәбир күнлиридә бейҗиңни зиярәт қилип, хитай баш министири ли кечяң билән сода сөһбити елип баридикән.

«Тәһдит астидики хәлқләр җәмийити» баянатида германийәниң кишилик һоқуқни қоғдаш мәсулийитидә чиң туруши керәклики тәкитләнгән. Баянатта мәзкур тәшкилатниң ирқий қирғинчилиқниң алдини елиш ишлириға мәсул мутәхәссиси хано шедлер хоңкоң вәзийитиниң муқимсизлиққа петип қалғанлиқи, германийәниң хитай һөкүмитини зораванлиқниң күчийишиниң алдини елиш хоңкоң хәлқи билән сөһбәт өткүзүшкә чақиришини тәләп қилған. Ханно шедлер йәнә уйғур районида бир йерим милйондин артуқ уйғур, қазақ вә қирғизларниң «қайта тәрбийәләш лагерлири» ға қамалғанлиқи, уларниң бу лагерларда системилиқ меңә ююшқа учраватқанлиқини тәкитләп, «хәлқара җәмийәт бу лагерлар тақалғучә бу мәсилини қайта-қайта оттуриға қоюши керәк» дегән. Хано шедлерниң тәкитлишичә, «баш министир меркел өзиниң) хитай ( баш министири ли кечяң билән өткүзидиған сөһбитидә униңға изчил бесим ишлитиши керәк» икән.

Ангела меркелниң зиярити хитай һөкүмити германийә парламентиниң икки  нәпәр нопозлуқ әзасиға виза беришни рәт қилған бир вақитта елип берилидикән. Германийә парламентиниң дигитал комитети билән кишилик һоқуқ комитети бу йил 8‏- вә 9‏-айларда хитайниң бейҗиң, шаңхәй, чоңчиң қатарлиқ шәһәрлирини вә уйғур аптоном районини зиярәт қилмақчи болған. Лекин хитай һөкүмити вәкилләр өмики тәркибидики германийә йешиллар партийәсидин болған парламент әзаси маргерета бавзи ханим билән християн демократлар партийәсидин болған парламент әзаси майкел брандқа виза беришни рәт қилған иди.

Пикирләр (0)
Share
Толуқ бәт