Хитай даирилири хотәндә бир түркүм «ешинча әмгәк күчлири» ни ишқа орунлаштурғанлиқини елан қилди

Мухбиримиз сада
2019-04-16
Елхәт
Пикир
Share
Принт

Уйғур дияридин милйондин артуқ уйғур җаза лагерлириға қамилип, буларниң арисидики бир қисимлири хитайниң ичкири өлкилиридики түрмиләргә йөткиливатқанлиқи илгири сүрүлүватқан бир мәзгилдә, хитайниң аталмиш «ешинча әмгәк күчини ишқа орунлаштуруш» сиясити бойичә хотән вилайити йеқиндин буян 22 миң адәмни ишқа орунлаштурғанлиқини елан қилди.

«Шинҗаң гезити» ниң 15-апрелдики хәвиридин мәлум болушичә, бу хил ишқа орунлаштуруш сиясити хотәндә бу йил 2-айдин башлап йүргүзүлгән болуп, бу 22 миң адәмниң конкрет немә хизмәт қилидиғанлиқи әскәртилмигән. 

Хәвәрдә дейилишичә, өткән бир йил ичидә хотән вилайитидә ишқа орунлаштурулған «ешинча әмгәк күчи» 611 миң 500 адәм қетимға йәткән болуп, 2017-йилиға қариғанда 9.23% Ашқан. Буниң ичидә вилайәт ичидә ишқа орунлаштурулғанлар 402 миң 500 адәм қетим, район атлап ишқа орунлаштурулғанлар 209 миң адәм қетим болған. Әмма қанчилик адәмниң ичкири хитайға йөткәлгәнлики ейтилмиған.

Хәвәрдә район атлап ишқа орунлаштурулғанларниң конкрет қәйәргә йөткәлгәнлики дейилмигән.

Бәзи уйғур паалийәтчилириниң билдүрүшичә, хотән вилайитигә охшаш уйғур нопуси бир қәдәр зич олтурақлашқан җайда хитай һөкүмити «ешинча әмгәк күчлири» ни йөткәп ишқа орунлаштуруш арқилиқ районниң нопусини тарқақлаштурушқа урунмақта икән. Әмәлийәттә йөткәп орунлаштурушниң асаслиқ нишанлириниң бири хитайниң ичкири өлкилири болмақта.

Һалбуки хитай һөкүмити бу хил «ишқа орунлаштуруш» сияситини муқимлиқни ишқа ашуруш, намратлиқни түгитиштики истратегийилик орунлаштуруш, дәп көрсәтмәктә.

Пикирләр (0)
Share
Толуқ бәт