Erkinlik sariyi intérnét alaqe tori erkinlikige a'it yilliq doklatini élan qildi

Muxbirimiz irade
2019-11-05
Élxet
Pikir
Share
Print

Amérikadiki nopuzluq kishilik hoquq organliridin "Erkinlik sariyi" 5-noyabir küni dunyadiki 65 döletning ijtima'iy alaqe tori erkinlik ehwaligha qarap chiqilghan yilliq doklatini élan qildi.

"Ijtima'iy alaqe tori krizisi" mawzusida élan qilin'ghan bu yilliq doklatta kishilerning pikir we munazire erkinlikige sorun hazirlap bériwatqan alaqe torlirini istibdat hakimiyetlerning pikir jehettin özlirige yaqmaydighan kishilerni nazaret qilidighan, békitidighan, ularning pikirlirini jinayet pakiti süpitide yighidighan sorunlargha aylanduruluwatqanliqi bayan qilin'ghan. Doklatta tekitlinishiche, ijtima'iy alaqe torliri hazir istibdat hakimiyetlerning insanlarni teqiblishini we ulargha zerbe bérishini qolaylashturmaqtiken.

Mezkur doklatta xitay bu yilmu "Intérnét erkinlikini eng éghir depsende qilghuchi" dölet bolup bahalan'ghan bolup, xitay hakimiyitining intérnétqa qaratqan kontrol we cheklimisi ilgiriki yillarda körülüp baqmighan derijide éghirlashqan. Xitay hökümitining intérnéttiki uchurni qamal qilish derijisi xongkongdiki xitay hökümitige qarshi namayishlar munasiwiti bilen eng yuqiri pellige chiqqan. Doklatta yene xitay hökümitining Uyghur élidiki intérnét tori sahesige qaratqan kontrol we basturushi heqqidimu tepsiliy melumatlar bérilgen bolup, uningda Uyghur élide yolgha qoyulghan "Qayta terbiye lagérliri "Gha adem tutushta xitay hökümitining del mushu intérnét alaqe torini ishletkenliki, mesilen kishilerni téléfonigha watsep chüshürgenliki, chet'ellerdiki tughqanliri bilen alaqe qilghanliqi yaki dini mezmundiki matériyallarni körgenlikidek sewebler bilen lagérgha qamighanliqini bayan qilghan.

Doklatta yene, xitay xakkirlirining chet'ellerdiki Uyghurlar qol téléfonlirigha we ular köp ziyaret qilidighan tor betlerge xakkirliq hujumi qozghighanliqimu tilgha élin'ghan. Doklatta "Shinjang rayoni xitay hökümitining digital istibdatliq modélini sinaq qilidighan bazisi qilinmaqta. Bu yerde muweppeqiyet qazan'ghan digital istibdatliq modéli xitayning bashqa ölkilirige omumlashturulmaqta" dep körsitilgen.

Toluq bet