Әнглийә парламент әзаси кейт осамор: «уйғурлар корона вируси юқумида унтулуп қалмаслиқи керәк»

Мухбиримиз әркин
2020-04-17
Елхәт
Пикир
Share
Принт

Әнглийә парламент әзаси кейт осамор әнглийә ташқи ишлар министири доминик раабқа мәктуп йезип, уйғурларниң корона вируси юқумида унтулуп қелинмаслиқи, уларниң бурунқидинму мислисиз бир хәвп астида туруватқанлиқини тәкитлигән. У, 6-апрел күни доминик раабқа язған мәктупида, «корона вируси хитай лагерлиридики уйғурларниң қийинчилиқиға техиму әҗәллик йеңи қийинчилиқларни пәйда қилди. Уларниң тутқундики шараити әҗәллик юқумниң ямришиға техиму қулайлиқ яритип, әркинликидин айрилған бу кишиләр үчүн йеңи апәтләргә йол ечиши мумкин» дегән.

Кейт осаморниң тәкитлишичә, униң сайлиғучилириниң һөкүмәтниң бу мәсилигә җиддий қариған-қаримиғанлиқи, бу мәсилини өзиниң ташқи сияситидә муһим орунға қойған-қоймиғанлиқини билиш һәққи бар икән. Осамор мәктупида «әнглийәниң уйғур хәлқи үчүн сөзләш әхлақий мәсулийити бар» дегән. У мәктупида йәнә һөкүмәтниң уйғур мәсилиси һәққидә ахирқи қетим хитай һөкүмити билән қачан сөзләшкәнлики, униң хитай билән болған кәлгүсидики алақиләрдә уйғур мәсилисини оттуриға қойидиған-қоймайдиғанлиқини сорап, доминик раабниң җаваб беришини тәләп қилған.

Мәзкур мәктуп вухәндә партлиған корона вируси дуняви юқумға айлинип, хәлқара җәмийәтниң диққити юқумға тақабил турушқа буралған мәзгилдә йезилған. Бу әһвал чәтәлдики уйғурларда шундақ кишилик һоқуқ тәшкилатлирида лагерлар мәсилисиниң көмүлүп қелиш, хитайниң бу вәзийәтни суйиистемал қилиш әндишилири күчәйткәниди.

Пикирләр (0)
Share
Толуқ бәт