Уйғур аптоном районлуқ деһқанчилиқ назаритиниң назири әкбәр ғопур тәкшүрүлүшкә башлиған

Мухбиримиз әркин
2019-08-26
Елхәт
Пикир
Share
Принт

Уйғур аптоном районлуқ деһқанчилиқ назаритиниң сабиқ назири вә муавин секретари әкбәр ғопур йеқинда хитай интизам тәкшүрүш вә ревизийә даирилири тәрипидин назарәт астиға елинип, тәкшүрүлүшкә башлиған.

Бу, хитай һөкүмитиниң 2017‏-йили уйғурларни кәң көләмлик тутқун қилип, 2 милйондәк мусулманни лагерларға қамиғандин бери тутқун қилинған бирқанчә уйғур назирниң биридур.

Хитай һөкүмити илгири орманчилиқ, маарип қатарлиқ назарәтләрниң назирлирини тутқун қилғаниди. Хитай мәркизи интизам тәкшүрүш вә ревизийә комитетиниң торида елан қилинған учурда көрситилишичә, бу йил 60 яшлиқ әкбәр ғопур «интизамға вә қанунға еғир дәриҗидә хилаплиқ қилиш» билән әйиблинип тәкшүрүлүшкә башлиған. Тәкшүрүш нәтиҗисиниң қандақ болғанлиқи мәлум болмисиму, лекин хитай һөкүмитиниң уйғур районидики сияситигә қошулмиған, униң сияситини иҗра қилишта актип болмиған яки униңға пикир билдүргән уйғур кадирларниң «парихорлуқ» қилиш, «интизамға хилаплиқ» қилиш билән әйиблинип һакимийәт органлиридин тазилап чиқириливатқанлиқи вә җазалиниватқанлиқи мәлум.

Мәлум болушичә, әкбәр ғопур 2013‏-йилдин 2017‏-йилғичә уйғур аптоном районлуқ деһқанчилиқ назаритиниң назирлиқи вәзиписини атқуруп, 2017‏-йили вәзиписидин айрилғаникән. 1959‏-Йили ақсуда туғулған әкбәр ғопур узун йил ақсуда наһийә һакими, шәһәр башлиқи, вилайәтлик парткомниң муавин секретари қатарлиқ вәзипиләрни атқурған. 2005‏-Йилдин 2013‏-йилғичә қәшқәр вилайәтлик мәмурий мәһкиминиң валиси, аптоном районлуқ һөкүмәтниң муавин баш катипи қатарлиқ вәзипиләргә йөткәлгәниди. Нөвәттә, униң тәкшүрүлүши диққәт қозғимақта.

Пикирләр (0)
Share
Толуқ бәт