Дуня уйғур қурултийи мусулман дунясини уйғурлар үчүн дәс турушқа чақирди

Мухбиримиз әркин
2018-12-28
Елхәт
Пикир
Share
Принт

Дуня уйғур қурултийи 28‏-декабир баянат елан қилип, мусулман дунясини болупму мусулманлар көп санлиқтики дөләтләрниң рәһбәрлирини хитайниң уйғурларға қаратқан қорқунчлуқ җазалаш қилмишиға қарита сүкүтни бузушқа чақирди.

Баянатта, ислам дунясиниң һазирға қәдәр «шәрқий түркистан» дики кризисқа қайтурған инкасиниң һәйран қаларлиқ дәриҗидә үмидсизлинәрлик икәнлики әскәртилип, «ғәрб дөләтлири бу мәсилидә изчил актип вә ашкара ипадә билдүрүп кәлгән болсиму, лекин мутләқ көпчилик мусулман дөләтлири бу ишқа ерәнсизлик билән қариди яки пүтүнләй көрмәскә салди» дейилгән.

Дуня уйғур қурултийиниң мәзкур баянати һиндонезийә, малайсия, түркийә қатарлиқ дөләтләрдики бир қисим аз санлиқ иҗтимаий гуруһлар намайиш қилип, хитайға наразилиқи билдүрүшкә башлиған, әмма мусулман һөкүмәтләр вә җәмийәтниң асаси еқими йәнила сүкүт қиливатқан бир мәзгилдә елан қилинди.

Йеқинда һиндонезийә өлималар кеңиши баянат елан қилип, һиндонезийә һөкүмитини уйғур мәсилисигә арилишишқа чақирған. Арқидинла бәзи диний җамаәтләр намайиш қилип, хитайға наразилиқи билдүргән иди.

Дуня уйғур қурултийи баянатида йәнә хитайниң роза тутуш, һәҗгә бериш вә балиларға диний исимларни қоюшни чәкләп, қуран-кәрим вә башқа диний китабларни мусадирә қилғанлиқи вә, көйдүргәнлики, уйғурларни чошқа гөши йейишкә, һарақ ичишкә зорлиғанлиқи, уйғур аяллирини хитай әркәклиригә тегишкә мәҗбурлиғанлиқи, нурғун мәсчитләрни чеқип ташлиғанлиқи, бир милйондин 3 милйонғичә уйғурни җаза лагерлириға қамиғанлиқини әскәртип, лекин «мусулман дуняси вәзийәтниң еғирлиқи, диний әркинликниң очуқ-ашкара һуҗумға учришиға қаримай, виҗдансизларчә сүкүт қилмақта» дегән.

Баянатта тәкитлинишичә, мусулман рәһбәрлири хитайға икки хил өлчәм қолланмақта икән. Баянатта, мусулман рәһбәрлириниң башқа дөләтләргә исламға вәһимә селиниватқанлиқи вә мусулманларниң зиянкәшликкә учришини тәкитләп, бирақ хитайға кәлгәндә сүкүт қиливатқанлиқи, уларниң бу һәрикити «исламниң негизлик өлчими вә униң принсипиға хилап» икәнлики билдүрүлгән.

Пикирләр (0)
Share
Толуқ бәт