Дуня банкиси: «хитайниң шинҗаңдики уйғур мәктәплиригә берилгән қәрзни хата ишләткәнликигә даир һечқандақ аламәт байқалмиди»

Мухбиримиз әркин
2019-08-30
Елхәт
Пикир
Share
Принт

Дуня банкиси 29‏-авғуст күни йәнә баянат елан қилип, уйғур районидики мәктәпләргә берилгән қәрз пулини қайта-тәкшүрүш чиққанлиқи, лекин қәрз пулниң башқа ишларға ишлитилгәнликигә даир һечқандақ бир аламәт байқалмиғанлиқини билдүргән. Йеқинда дуня банкисиниң 2015‏-йили уйғур районидики 5 мәктәпкә «кәспий тәрбийиләш программиси» намида 50 милйон доллар қәрз бәргәнлики ашкариланған. Хитай һөкүмитиниң 2 милйондәк уйғур, қазақ қатарлиқларни «кәспий тәрбийиләш» намида лагерларға солиғанлиқи илгири сүрүлүватқан бир мәзгилдә дуня банкисиниң «кәспий тәрбийиләш программиси» намида униңға қәрз бериши америка дөләт мәҗлиси әзалириниң вә кишилик һоқуқ тәшкилатлириниң диққитини қозғиған. Америка дөләт мәҗлисиниң икки әзаси йеқинда дуня банкисиниң президенти дәйвид малпасқа мәктуп йезип, униң буниңға чүшәнчә беришини тәләп қилған.

Дуня банкисиниң баянатчиси дәйвид дәис өткән һәптә радийомизға баянат елан қилип, уйғур районидики мәктәпләргә қәрз бәргәнликини ақлиғаниди. Фирансийә агентлиқиниң 30‏-авғуст хәвәр қилишичә, дуня банкиси пәйшәнбә күни елан қилғанда баянатида: «дуня банкиси бу программида мәктәпләргә бәргән қәрзниң программа сиртидики һәрқандақ бир мәқсәткә ишлитилгәнликигә даир һечқандақ аламәт байқалмиди» дегән. Баянатта қәйт қилинишичә, нөвәттә дуня банкиси йеқинда оттуриға қоюлған әндишиләргә асасән бир мутәхәссисләр гурупписиниң башчилиқида қошумчә тәкшүрүш елип бармақтикән. 

Баянатта, тәкшүрүш елип бериливатқанлиқи, әгәр һечқандақ хилаплиқ көрүлмисә, программиниң давам қилидиғанлиқи билдүрүлгән. Лекин, бәзи мустәқил тәтқиқатчиларниң илгири сүрүшичә, программидики мәктәпләрниң лагерлар билән алақиси болмиған тәқдирдиму, бу мәктәпләр һәмкарлиқ елип бериватқан йәрлик техника мәктәплириниң лагерлар билән алақиси бар икән.

Пикирләр (0)
Share
Толуқ бәт