Amérikaning xitaydiki elchixanisi twittér arqiliq dolqun eysa ependini tebriklidi

Muxbirimiz irade
2019-05-02
Élxet
Pikir
Share
Print

Amérikaning xitaydiki elchixanisi twittér tori arqiliq dunya Uyghur qurultiyining re'isi dolqun eysa ependini tebriklidi.

Nöwette nyu-yorkta b d t ning yerlik milletler mesilisi munbiri yighinigha qatnishiwatqan dolqun eysa ependi Uyghur diyaridiki Uyghur, qazaq we bashqa yerlik milletlerning nöwette uchrawatqan insaniy xorluqliri, til we medeniyet cheklimiliri, xitayning jaza lagérlirigha qamalghan ikki milyondin artuq bigunah insanning chékiwatqan azabliri heqqide söz qilghan shundaqla xelq'ara jem'iyettin Uyghurlarning ehwaligha jiddiy mu'amile qilishni we jaza lagérlirining taqilishi heqqide xitay hökümitige bésim ishlitishini telep qilghan idi. 

Amérikaning xitayda turushluq elchixanisi twittérdiki resmiy supisida töwendikilerni bildürgen: "Kishilik hoquq pa'aliyetchiliri b d t da bésim we tehditke uchrimay turup özining awazini anglitalishi kérek. Biz dolqun eysa ependining b d t da shinjangdiki kishilik hoquq krizisini otturigha qoyush imkanigha érishkenlikidin memnun bolduq." 

Twittérdiki bu tebrik xitayche we in'glizche ikki xil tilda élan qilin'ghan. Chet'ellerdiki Uyghur közetküchiler buni dolqun eysa ependini b d t diki heriketlirini chekleshke urunup kéliwatqan xitaygha bérilgen bir signal, dep qarimaqta. 

Yéqinda xitayning b d t diki sabiq emeldari wu xongbo xitaydiki bir téléwiziye programmisigha qatnashqanda özining "Merkizi gérmaniyede bolghan shinjangliq musteqilchi we bölgünchi küchlerning wekilini b d t yighin meydanidin heydep chiqarghanliqi" heqqide dawrang salghan idi. Biraq d u q re'isi dolqun eysa ependining bildürüshiche, xitayning b d t da turushluq mezkur emeldari b d t bixeterlik küchlirige "Dolqun eysa xelq'ara saqchida tutush buyruqi chiqirilghan térrorchi" dégen yalghan melumatni bérip, uni shu qétim yighin zalidin chiqiriwételigen bolsimu, emma bu mesilige amérika, yawropa ittipaqi we b d t ning jiddiy arilishishi seweblik dolqun eysa b d t yighin meydanigha qaytidin kirip, xitay terepni mat qilghan iken.

Toluq bet