Американиң хитайдики әлчиханиси твиттер арқилиқ долқун әйса әпәндини тәбриклиди

Мухбиримиз ирадә
2019-05-02
Елхәт
Пикир
Share
Принт

Американиң хитайдики әлчиханиси твиттер тори арқилиқ дуня уйғур қурултийиниң рәиси долқун әйса әпәндини тәбриклиди.

Нөвәттә ню-йоркта б д т ниң йәрлик милләтләр мәсилиси мунбири йиғиниға қатнишиватқан долқун әйса әпәнди уйғур дияридики уйғур, қазақ вә башқа йәрлик милләтләрниң нөвәттә учраватқан инсаний хорлуқлири, тил вә мәдәнийәт чәклимилири, хитайниң җаза лагерлириға қамалған икки милйондин артуқ бигунаһ инсанниң чекиватқан азаблири һәққидә сөз қилған шундақла хәлқара җәмийәттин уйғурларниң әһвалиға җиддий муамилә қилишни вә җаза лагерлириниң тақилиши һәққидә хитай һөкүмитигә бесим ишлитишини тәләп қилған иди. 

Американиң хитайда турушлуқ әлчиханиси твиттердики рәсмий суписида төвәндикиләрни билдүргән: «кишилик һоқуқ паалийәтчилири б д т да бесим вә тәһдиткә учримай туруп өзиниң авазини аңлиталиши керәк. Биз долқун әйса әпәндиниң б д т да шинҗаңдики кишилик һоқуқ кризисини оттуриға қоюш имканиға еришкәнликидин мәмнун болдуқ.» 

Твиттердики бу тәбрик хитайчә вә инглизчә икки хил тилда елан қилинған. Чәтәлләрдики уйғур көзәткүчиләр буни долқун әйса әпәндини б д т дики һәрикәтлирини чәкләшкә урунуп келиватқан хитайға берилгән бир сигнал, дәп қаримақта. 

Йеқинда хитайниң б д т дики сабиқ әмәлдари ву хоңбо хитайдики бир телевизийә программисиға қатнашқанда өзиниң «мәркизи германийәдә болған шинҗаңлиқ мустәқилчи вә бөлгүнчи күчләрниң вәкилини б д т йиғин мәйданидин һәйдәп чиқарғанлиқи» һәққидә давраң салған иди. Бирақ д у қ рәиси долқун әйса әпәндиниң билдүрүшичә, хитайниң б д т да турушлуқ мәзкур әмәлдари б д т бихәтәрлик күчлиригә «долқун әйса хәлқара сақчида тутуш буйруқи чиқирилған террорчи» дегән ялған мәлуматни берип, уни шу қетим йиғин залидин чиқириветәлигән болсиму, әмма бу мәсилигә америка, явропа иттипақи вә б д т ниң җиддий арилишиши сәвәблик долқун әйса б д т йиғин мәйданиға қайтидин кирип, хитай тәрәпни мат қилған икән.

Пикирләр (0)
Share
Толуқ бәт