Amérika hökümitining xelq'ara diniy erkinlik heqqidiki buyruqi qizghin alqishlandi

Muxbirimiz eziz
2020-06-03
Élxet
Pikir
Share
Print

2-Iyun küni amérika prézidénti donald tramp amérika hökümitining xelq'ara diniy erkinlikni ilgiri sürüsh xizmitige yétekchi bolidighan ijra'iye buyruqini élan qilghanidi. Mezkur buyruqta donald tramp diniy erkinlikning amérikadiki birinchi orunda turidighan erkinlik ikenlikini, shu sewebtin dunya miqyasidiki barliq diniy erkinlik heqlirining amérika tashqi siyasitide aldi bilen nezerge élinidighan amil bolushi lazimliqini bildürdi.

Sekkiz bölümge ayrilghan mezkur prézidént buyruqi xelq'araliq menidin tarqitilghan. Uningda tepsiliy qilip barliq diniy jama'et we diniy mu'esseselerning dexli-terz qilishqa bolmaydighan muqeddes heqler ikenliki, xelq'ara diniy erkinlik xizmiti üchün ajritilidighan mebleghning köpeytilidighanliqi, shuningdek xelq'ara diniy erkinlikni amérika diplomatiyisi bilen mujessemleshtürüsh lazimliqi hemde maliye ministirining diniy erkinlikni chekligen döletlerge qarita "Yershari magnétiski qanuni" we bashqa jaza tedbirlirini ijra qilidighanliqi alahide tekitlen'gen. Buninggha qoshumche halda amérika tashqi ishlar ministirining 180 kün ichide xelq'ara dinyy erkinlikni algha sürüsh heqqidiki tepsiliy pilan layihesini teyyarlaydighanliqi éytilghan.

Washin'gton shehiridiki xelq'ara diniy erkinlik komitéti mezkur prézidént buyruqini qizghin alqishlaydighanliqini bildürdi. Komitét re’‍isi toniy pérkins bu heqtiki bayanatida "Biz prézidént trampning xelq'ara diniy erkinlikni dölet bixeterliki we tashqi siyaset sahesidiki muhim amillar qatarigha tizghanliqini qizghin qollaymiz" dédi. Mezkur komitét yillardin buyan amérika hökümitini dunyawi miqyasta diniy erkinlikni algha süridighan bir omumiy istratégiye tüzüp chiqishqa dewet qilip kéliwatqan bolup, bu qétimqi prézidént buyruqining tarqitilishi del mushu chaqiriqqa qayturulghan jawab teriqiside otturigha chiqqan.

Amérika xelq'ara diniy erkinlik komitétining yilliq doklatlirida xitay hökümiti yillardin buyan diniy étiqad heqlirini depsende qilishtiki eng qebih döletler qatarida tilgha éliniwatqan bolup, mezkur buyruqning bu jehetlerdiki xizmetlerge yéngi hayati küch élip kélishi ümid qilinmaqtiken.

Toluq bet