Chaqiliq nahiyeside xitayning chong kölemlik yene bir choshqa baqmichiliq bazisi qurulushqa bashlighan

Muxbirimiz erkin
2020-06-05
Élxet
Pikir
Share
Print

Xitay hökümitining musulmanlar rayoni bolghan Uyghur diyarini xitaydiki eng chong baqmichiliq bazisigha aylandurush pilani keng kölemlik yolgha qoyulmaqta. Xitay da'iriliri qeshqer we bay nahiyerliridin kéyin Uyghur élining chaqiliq nahiyesigimu chong kölemlik choshqa baqmichiliq bazisi qurushqa bashlighan. Xitay da'iriliri buning aldida qeshqer konasheher nahiyesi we aqsuning bay nahiyeliride chong kölemlik choshqa baqmichiliq bazirilirini quridighanliqini élan qilghan idi.

Közetküchiler xitay da'irilirining mezkur pilanini tenqidlep, uning musulmanlar asasliq salmaqni igileydighan bu rayon'gha choshqa baqmichiliq bazilirini qurushining "Gherezlik heriket" ikenliki, buning xitayning mezkur rayonda yolgha qoyuwatqan "Medeniyet qirghinchliqi" siyasitining bir parchisi ikenlikini ilgiri sürgen idi. Xitaydiki "Junggo xewerler" torining ashkarilishiche, chaqiliq nahiyesidiki choshqa baqmichiliq bazisi mezkur nahiyening tashsay kentide qurulushqa bashlighan.

Xewerde bu choshqa baqmichiliq bazisigha 2 milyard 200 milyon yüen meblegh ajritilghanliqi, uningda yiligha 1 milyon 100 ming tuyaq choshqa béqilidighanliqi ilgiri sürülgen. Bu qurulushni "Chyangdu ormanchiliq-baqmichiliq hessidarliq cheklik shirkiti" namliq bir shirket üstige alghan bolup, 20-may küni resmiy qurulush bashlan'ghan. Uyghur aptonom rayonluq hökümet bu yilning bashlirida mezkur rayonning xitaydiki eng chong choshqa baqmichiliqi bazisigh aylandurulup, xitay ölkilirini choshqa göshi bilen teminleydighanliqini élan qilghan.

Toluq bet