Австралийәдики бәзи хитай мутәхәссисләр техника ширкити қуруп, хитайниң уйғурларни тәқиблишигә ярдәмләшкән

Мухбиримиз әркин
2019-08-26
Елхәт
Пикир
Share
Принт

Австралийә университетлирида йетишкән учур техника саһәсидики бәзи хитай мутәхәссислириниң хитайда техника ширкити қуруп, уйғурларни тәқибләшкә ярдәмләшкәнлики илгири сүрүлди. Австралийә истратегийәлик сиясәт институтиниң торида 26‏-авғуст күни елан қилинған бир доклатта көрситилишичә, «коала сүний әқил технологийә» ширкити әнә шундақ карханиларниң бири икән. Доклатта, бу ширкәтниң хитай һөкүмитини сүний әқил техникиси билән тәминләватқанлиқи, униң бу җәрянда австралийәдики университет вә һөкүмәтниң тәтқиқат мәблиғигә еришкәнлики илгири сүрүлгән. Доклатта қәйт қилинишичә, бу ширкәтни австралийә кюнисланд университетиниң бир хитай профессори қуруп чиққан болуп, бу ширкәт хитай һөкүмитиниң алтай вилайитидики дигитал назарәт системиси вә хитай-қазақистан чеграсини контрол қилишини техника билән тәминләп кәлмәктикән.

Доклатта, хең тавшен исимлик хитай профессорниң 2014‏-йили хитайниң «миң талант программиси» ға аваз қошуп, хитай електрон пән-техникиси университетиға ишлигәнлики, униң 2015‏-йили «коала сүний әқил технологийә» ширкитини қуруп, һөкүмәтни сүний әқил техникиси билән тәминләшкә башлиғанлиқи билдүрүлгән.

Доклатта қәйт қилинишичә, хитайниң уйғур районидики дигитал тәқибләш системиси бу ширкәтни зор пайдиға ериштүргән. Доклатта, бу ширкәтниң һазирқи сәрмайиси 200 милйон долларға йәткәнлики, униң 2020‏-йили сәрмайисини 1 милярд долларға йәткүзүшни пиланлаватқанлиқи илгири сүрүлгән.

Доклатта қәйт қилинишичә, нөвәттә бу ширкәт техникисини «өзиниң тәрәққий қилдурғанлиқи» ни илгири сүрсиму, лекин австралийә тәтқиқат комитети илгири хең тавшинға 2 милйон 600 миң доллар тәтқиқат ярдими бәргән икән. Доклатта, униң «куала сүний әқил технологийә ширкити» ни қурғандин кейинму хитайдики тәҗрибиханисиға бир милйон 600 миң доллар ярдәм алғанлиқи илгири сүрүлгән.

Пикирләр (0)
Share
Толуқ бәт