Xitay hökümiti lagérlar heqqidiki "Aq tashliq kitab" ning rastliqini ispatlashqa tirishmaqta

Muxbirimiz eziz
2019-08-20
Élxet
Pikir
Share
Print

Xitay hökümiti yéqinda élan qilghan "Kespiy terbiyelesh mektipi heqqidiki aq tashliq kitab" dunyaning herqaysi jayliridiki teshkilatlar shexslerning qattiq mesxirisige qalghanidi. Bolupmu "Zimistan" torida élan qilin'ghan "Aq tashliq kitabmu yaki aq tashliq yalghanchiliqmu?" témisidiki mexsus obzorda buningdiki köpligen saxtiliq we aldamchiliq urunushliri toluq eks ettürülidu.

Xitay hökümiti bu aq tashliq kitabta lagérlarning qandaq rahetlik makan ikenliki heqqide köpligen bayanlarni bergenliki melum. Emdilikte ularning koréye, sin'gapor, pakistan qatarliq döletlerdiki birqisim diplomatlar we muxbirlarni teklip qilip, xitay hökümitining bu "Mektepler" arqiliq qandaq "Shanliq netijiler" ni qolgha keltürgenliki heqqide söz qildurushi kishilerning diqqitini qozghidi.

Shinxu'a agéntliqi 20-awghusttiki xewiride pakistan döletlik téléwiziyesining filim ishligüchisi abrar nésim waxlaning lagérlar ziyaritidin kéyinki tesirati bayan qilinidu. Waxlaning bildürüshiche, u ilgiri gherb axbaratliridin Uyghurlarning diniy étiqadta qattiq cheklimige uchrawatqanliqi heqqide köpligen xewerlerni oqughan. U bu qétim xitay hökümitining teklipige bina'en lagérlarni ziyaret qilghandin kéyin: "Men Uyghur imamlar we taliplar bilen sözleshtim. Ular héchqandaq diniy cheklime yoqluqini bildürdi. Kespiy terbiyelesh mektipidikilerdin héchkimmu birer éghiz aghrinmidi, eksiche özlirining bu jaydiki turmushidin tolimu razi ikenlikini bildürdi" dégen.

Dunya Uyghur qurultiyining bayanatchisi dilshat réshit bu toghrisida pikir qilip: "Bundaq ziyaret filimlirida ashu shekilde so'al sorashlarning arqigha qandaq tehdit amillirining yoshurun'ghanliqi mana men depla chiqip turidu. Lagérlar hemmila yerde kéngiyiwatqanda u sorighan kishiler némimu déyeleytti?" dep körsetti.

Toluq bet