Хитай һөкүмити лагерлар һәққидики «ақ ташлиқ китаб» ниң растлиқини испатлашқа тиришмақта

Мухбиримиз әзиз
2019-08-20
Елхәт
Пикир
Share
Принт

Хитай һөкүмити йеқинда елан қилған «кәспий тәрбийәләш мәктипи һәққидики ақ ташлиқ китаб» дуняниң һәрқайси җайлиридики тәшкилатлар шәхсләрниң қаттиқ мәсхирисигә қалғаниди. Болупму «зимистан» торида елан қилинған «ақ ташлиқ китабму яки ақ ташлиқ ялғанчилиқму?» темисидики мәхсус обзорда буниңдики көплигән сахтилиқ вә алдамчилиқ урунушлири толуқ әкс әттүрүлиду.

Хитай һөкүмити бу ақ ташлиқ китабта лагерларниң қандақ раһәтлик макан икәнлики һәққидә көплигән баянларни бәргәнлики мәлум. Әмдиликтә уларниң корейә, сингапор, пакистан қатарлиқ дөләтләрдики бирқисим дипломатлар вә мухбирларни тәклип қилип, хитай һөкүмитиниң бу «мәктәпләр» арқилиқ қандақ «шанлиқ нәтиҗиләр» ни қолға кәлтүргәнлики һәққидә сөз қилдуруши кишиләрниң диққитини қозғиди.

Шинхуа агентлиқи 20-авғусттики хәвиридә пакистан дөләтлик телевизийәсиниң филим ишлигүчиси абрар несим вахланиң лагерлар зияритидин кейинки тәсирати баян қилиниду. Вахланиң билдүрүшичә, у илгири ғәрб ахбаратлиридин уйғурларниң диний етиқадта қаттиқ чәклимигә учраватқанлиқи һәққидә көплигән хәвәрләрни оқуған. У бу қетим хитай һөкүмитиниң тәклипигә бинаән лагерларни зиярәт қилғандин кейин: «мән уйғур имамлар вә талиплар билән сөзләштим. Улар һечқандақ диний чәклимә йоқлуқини билдүрди. Кәспий тәрбийәләш мәктипидикиләрдин һечкимму бирәр еғиз ағринмиди, әксичә өзлириниң бу җайдики турмушидин толиму рази икәнликини билдүрди» дегән.

Дуня уйғур қурултийиниң баянатчиси дилшат решит бу тоғрисида пикир қилип: «бундақ зиярәт филимлирида ашу шәкилдә соал сорашларниң арқиға қандақ тәһдит амиллириниң йошурунғанлиқи мана мән дәпла чиқип туриду. Лагерлар һәммила йәрдә кеңийиватқанда у сориған кишиләр немиму дейәләйтти?» дәп көрсәтти.

Пикирләр (0)
Share
Толуқ бәт