Дуня уйғур қурултийи «хәлқара ана тил күни» мунасивити билән дуняға чақириқ елан қилди

Мухбиримиз ирадә
2019-02-21
Елхәт
Пикир
Share
Принт

Дуня уйғур қурултийи 21-феврал «дуня ана тил күни» мунасивити билән баянат елан қилип, уйғур ана тили йүзлиниватқан хәтәрлик вәзийәтни тәкитлиди.

Мәзкур баянатта хитай даирилириниң көп йиллардин бери «қош тил маарипи» нами астида уйғур тилини чәткә қеқиш вә униң орниға хитай тилини дәсситишни әмәлгә ашуруп кәлгәнлики, әмма кейинки икки йилдин бери болса уйғур тилиниң мәктәпләрдә пүтүнләй чәкләнгәнлики баян қилинған.

Баянатта буниңға хотән вилайәтлик маарип идариси өткән йили мәктәпләрдә мәйли дәрсхана, мәйли мәктәп қорусида болсун уйғур тилини қәтий ишләтмәслик һәққидә елан қилған уқтуруш пакит қилип көрситилгән.

Дуня уйғур қурултийи милйонлиған уйғур балилириниң өз ана тилиға варислиқ қилишиға җиддий тәһдит пәйда қилған юқириқи бу сиясәтләрниң ахири берип лагер түзүмигичә кеңәйгәнлики, лагер түзүминиң уйғур миллий кимлики вә ана тилиға қаттиқ зиянкәшлик қиливатқанлиқини баян қилған.

Улар баянатта «әгәр дуня буниңға қарши бир тәдбир алмиған тәқдирдә шәрқий түркистандики уйғурларниң өз ана тили вә мәдәнийитидин мәһрум қелиши мумкин» дәп әскәрткән. Уйғур ана тили вә мәдәнийитини йоқитишниң дуня мәдәнийәт хәзиниси үчүн зор йоқитиш болидиғанлиқи тәкитләнгән бу баянатта хәлқара җамаәт хитайниң уйғур тилини йоқитиш җәһәттә пиланлиқ, системилиқ вә һуҗум характерлик елип бериватқан иҗраатлириға қарши тәдбир қоллинишқа чақирилған.

Материялларда көрситилишичә, 1952-йили шәрқий пакистан дәп аталған баңладишта ана тил һәрикити башланған болуп, бу һәрикәт баңладишниң мустәқиллиқиға түрткә болған; 1999-йили бирләшкән дөләтләр тәшкилати мәзкур һәрикәтни хатириләш вә дунядики барлиқ милләтләрниң ана тилини қоғдаш һәққи барлиқини тәкитләш үчүн 21-феврал күнини «хәлқара ана тили күни» дәп елан қилған.

Пикирләр (0)
Share
Толуқ бәт