«Зулмәт қойниға домилаватқан уйғурлар дияри» һәққидики әндишә күчәймәктә

Мухбиримиз әзиз
2019-12-31
Елхәт
Пикир
Share
Принт

Америкадики оқурмәнлири бир қәдәр көп болған гезитләрдин «чәтәл сиясити» 30-декабир күни тәһрират мақалииси елан қилип, уйғурлар дуч келиватқан зулумлар һәққидә шунчә көп мәлуматлар оттуриға чиққан болсиму «хитай һөкүмити бу әһвалларға көзини митму қилип қоймиди» дәп хуласә чиқарди. Шуниңдәк уйғурлар дияриниң «зулмәт өз қойниға дәм тартиватқан» әһвалда икәнликини тәкитлиди.

«Чәтәл сиясити» гезити өзлириниң икки йилдин буян лагерлар мәсилисини изчил хәвәр қилип келиватқанлиқини, җүмлидин 2019-йилиниң өзидила лагерлар мәсилиси бойичә көпчиликкә тонулған бир қисим тор язғучилириға, җүмлидин адрян зенз, җин бунин, бесаний ибраһимиян қатарлиқларниң уйғурлар учраватқан түрлүк бастурушлар вә лагерлар һәққидики мақалилириға йетәрлик орун берип, бу мәсилиләрниң хәлқараға яхши тонулушиға шараит яритип бәргәнликини, әмма шундақтиму һазир хитай һөкүмитиниң йәнила өзиниң билгинини қиливатқанлиқини әпсуслуқ ичидә баян қилиду. 

Һазирға қәдәр чәтәлләрдики көплигән ахбарат вастилири уйғурлар дияридики зор тутқун, хитай һөкүмитигә бу җәһәттә бесим ишлитиш, тутқунларниң әрзан әмгәк күчигә айландурулуши қатарлиқ мәсилиләр бойичә нурғун пакитлар вә тәнқид мақалилири елан қилған иди. Хитай һөкүмити бу язмилардин қаттиқ биарам болған болсиму, уларниң бу җәһәттә түплүк өзгириш һасил қилидиғанлиқи һәққидә һазирғичә һечқандақ бишарәт мәлум әмәс.

Пикирләр (0)
Share
Толуқ бәт