Барней сандерс: «мән президент болуп қалсам бейҗиң даирилиригә уйғурларни җазалашниң бәдилини төләткүзимән»

Мухбиримиз әркин
2019-09-02
Елхәт
Пикир
Share
Принт

Америка демократлар партийәсиниң президент намзатлириниң бири, кеңәш палата әзаси барней сандерс, өткән шәнбә күни америкадики бир мусулманлар тәшкилатиниң йиғилишида нутуқ сөзләп, әгәр өзи президнетлиққа сайлинип қалса, хитайға уйғурларни җазалашниң бәдилини төлитидиғанлиқини билдүргән.

Барней сандерс «уйғур кишилик һоқуқ қанун лайиһәси» гә имза қойған кеңәш палата әзаси, шундақла 2020‏-йилдики америка президент сайлиминиң демократлар партийәси намзатлиқини талишиватқан күчлүк кандидатларниң биридур. У юқириқи сөзләрни 31‏-авғуст күни тексас штатиниң хюстон шәһиридә өткүзүлгән шимали америка ислам җәмийитиниң йиллиқ йиғинида тәкитлигән.

Барней сандерс президент трампни тәнқидләп, мундақ дегән: «мән шуни ениқ ейтай, мән дунядики истибдат һакимийәтләргә һерисмән һазирқи президенттин пәрқлиқ һалда демократийә вә кишилик һоқуқни америкиниң әң алдинқи хизмәт нишани қилип таллаймән. Биз сөзләватқан һазирниң өзидә хитай шинҗаң өлкисидики мусулманларға қарита кәң көләмлик қамаш программисини йолға қоймақта. Мениң һөкүмитим бизниң хәлқара иттипақдашлиримиз билән һәмкарлишип, бейҗиңға мусулман пуқралирини яки башқа һәрқандақ бир хәлқләр топини хорлиса, униң хәлқара вә иқтисади орниға зиян йетидиғанлиқини тонутуп қойимиз. Биз униң бу қилмишиға йол қоймаймиз,» дегән.

У йәнә радикал исламниң тәһдити һәққидә тохтилип, радикал исламниң зораванлиқиниң әң көп зиянкәшликигә учриған хәлқләрниң йәнила мусулманлар икәнликини тәкитлигән. У, «һәқиқәт шуки, әгәр биз мәнтиқсиз зораванлиққа қарши мувәппәқийәт қазинимиз дәйдикәнмиз, биз өз ара бирлишишимиз, бир-биримизни бәтбәшириләштүрмәсликимиз керәк» дегән.

Нөвәттә хитайниң 2 милйондәк уйғурни йиғиветиш лагерлириға қамиши вә америка һөкүмитиниң буниңға қарши қандақ тәдбир қоллиниши керәклики президент намзатлириниң муназирилиридики назук бир тема болуп кәлмәктә.

Пикирләр (0)
Share
Толуқ бәт