Сигал самуел уйғурларниң бастурулушиға мунасивәтлик сәккиз соалға җаваб бәрди

Мухбиримиз әзиз
2019-05-01
Елхәт
Пикир
Share
Принт

Америкадики «вокс» журнилиниң кәспий язғучиси сигал самуел өткән йилдин башлап мәхсус уйғурларниң тутқун вә бастуруш обекти болушиға мунасивәтлик ички вә ташқи сәвәбләрни тәкшүрүватқан иди. 26-Апрел күни у мәхсус сөһбәт программисиға тәклип қилинип, өзиниң издинишлири асасида сәккиз чоң соалға җаваб бәрди.

Сигал ханим буниңда алди билән хитай һөкүмитиниң ғайәт зор миқдардики нефит, тәбиий газ қатарлиқ йәр асти байлиқи болған һәмдә «бир бәлвағ бир йол» қурулуши үчүн муһим әһмийәткә игә болған уйғур дияриниң хитай қолидин чиқип кәтмәслики үчүнла нөвәттики милйонлиған кишини лагерға солаш қилмишиниң садир болуватқанлиқини чүшәндүрди. Шундақла лагерларда зади немиләрниң болуватқанлиқи, бу җайлардики қәбиһликләр һәққидә ташқи дуняниң көп нәрсә билип кәтмәйдиғанлиқини, шундақла хитай һөкүмитиниң бу лагерларни «кәспий тәрбийиләш мәктипи» дәп тәшвиқ қилишиниң бир қисим кишиләрни қаймуқтуруп қоюватқанлиқини, бу «мәктәп» ләрниң әмәлийәттә шәкли өзгәргән түрмә икәнликини баян қилди.

Сөһбәттә асаслиқ муһакимә қилинған йәнә бир нуқта уйғурлар дуч келиватқан зор көләмлик бастурушқа дуняниң қандақ инкас қайтуруши болди. Болупму уйғурлар билән охшаш диний етиқадқа игә мусулманлар дунясиниң уйғурлар үчүн яқа йиртип оттуриға чиқалмиғанлиқи, хитайниң иқтисадий җәһәттики үстүнлүкигә тайинип ғәрб дунясидики бир қисим әлләрдин башқа мусулманлар дунясиниму уйғурлар һәққидә зуван сүрмәс қиливәткәнлики аңлиғучиларни һәммидинму бәк һәйран қалдурди. Бу һәқтики мунасивәтлик әһвалларни баян қилғанда сигал ханим ғәрб дунясида хели обданла базар тепип қалған «ислам вәһимиси» сәвәбидин хитай компартийиси ислам динини «роһий кесәллик», «зәһәрлик өсмә» дегәндәк сүпәтләр билән атиғандиму ғәрб дунясидики бир қисим кишиләрниң буниңдин ғәлитилик һес қилмиғанлиқини тәкитләп өтти.

Пикирләр (0)
Share
Толуқ бәт