Amérika tashqi ishlar ministirliqi: "Xitayning Uyghurlarni keng kölemlik tutqun qilishi xelq'ara ehdinamilerni depsende qilishtur"

Muxbirimiz erkin
2019-04-26
Élxet
Pikir
Share
Print

Amérika tashqi ishlar ministirliqi twétérda arqa-arqidin bayanat élan qilip, xitay hökümitining Uyghur we bashqa musulman az sanliq milletlerni keng kölemlik tutqun qilip yighiwélish lagélirigha qamishining xelq'ara ehdinamilarni depsende qilish ikenlikini bildürgen.

Bayanatta yene, xitay hökümitining bu xil qilmishini  "Térrorluqqa qarshi turush yolidiki zörür chare", dep aqlishi tenqid qilinip, uning radikalliqni kücheytidighanliqi tekitlen'gen.

Amérika hökümiti xitayning 2 milyondek Uyghur, qazaq we bashqa az sanliq musulman milletlerni lagérlargha qamap, lagér sirtidiki puqralarni omumyüzlük teqib astigha élishini izchil közitip  qilip keldi. Yéqinda amérika tashqi ishlar ministiri mayk pompé'o, xitayning herikitini  "Yirginchlik" dep eyibligen. Biraq kishilik hoquq teshkilatliri tramp hökümitini xitayni tenqid qilip qoyush bilen boldi qilmay, uninggha qarita keskin tedbir qollinishni telep qilmaqta.

Amérika tashqi ishlar ministirliqining 24‏-aprél élan qilghan bayanatida: "Xitay Uyghur we bashqa musulman az sanliq milletlerni basturushi we keng kölemlik qamishini térrorluqqa qarshi turush kürishidiki zörüriyet, désimu, lékin uning zorlash xaraktérlik teqiplishi, xalighanche tutqun qilishi, iz-déreksiz ghayib qiliwétishi we ten jazasi bérishi radikalliqning küchiyishini ilgiri süridu" déyilgen.

Uning 23‏-aprél élan qilin'ghan bayanatida: "Xitay hökümitining Uyghur we bashqa az sanliq musulman milletlerni basturushi we keng kölemlik qamishi uniwérsal kishilik hoquq xitapnamisining 3‏-, 10‏-, 18‏-maddiliridiki kishilik hoquqning uniwérsalliqi we tartiwélishqa bolmaydighanliqigha da'ir belgilimilerni depsende qilishtur" déyilgen. Amérika tashqi ishlar ministirliqining yuqiriqi ikki bayanati, xitayning 25‏-aprél béyjingda bashlan'ghan  " Bir belwagh bir yol" xelq'ara hemkarliq yighini harpisida élan qilin'ghan. Bu qétimqi yighin'gha gherbtiki démokratik dölet rehberlirining asasen héchbiri qatnashmighan idi.
Toluq bet