Америка ташқи ишлар министирлиқи: «хитайниң уйғурларни кәң көләмлик тутқун қилиши хәлқара әһдинамиләрни дәпсәндә қилиштур»

Мухбиримиз әркин
2019-04-26
Елхәт
Пикир
Share
Принт

Америка ташқи ишлар министирлиқи тветерда арқа-арқидин баянат елан қилип, хитай һөкүмитиниң уйғур вә башқа мусулман аз санлиқ милләтләрни кәң көләмлик тутқун қилип йиғивелиш лагелириға қамишиниң хәлқара әһдинамиларни дәпсәндә қилиш икәнликини билдүргән.

Баянатта йәнә, хитай һөкүмитиниң бу хил қилмишини  «террорлуққа қарши туруш йолидики зөрүр чарә», дәп ақлиши тәнқид қилинип, униң радикаллиқни күчәйтидиғанлиқи тәкитләнгән.

Америка һөкүмити хитайниң 2 милйондәк уйғур, қазақ вә башқа аз санлиқ мусулман милләтләрни лагерларға қамап, лагер сиртидики пуқраларни омумйүзлүк тәқиб астиға елишини изчил көзитип  қилип кәлди. Йеқинда америка ташқи ишлар министири майк помпео, хитайниң һәрикитини  «йиргинчлик» дәп әйиблигән. Бирақ кишилик һоқуқ тәшкилатлири трамп һөкүмитини хитайни тәнқид қилип қоюш билән болди қилмай, униңға қарита кәскин тәдбир қоллинишни тәләп қилмақта.

Америка ташқи ишлар министирлиқиниң 24‏-апрел елан қилған баянатида: «хитай уйғур вә башқа мусулман аз санлиқ милләтләрни бастуруши вә кәң көләмлик қамишини террорлуққа қарши туруш күришидики зөрүрийәт, десиму, лекин униң зорлаш характерлик тәқиплиши, халиғанчә тутқун қилиши, из-дерәксиз ғайиб қиливетиши вә тән җазаси бериши радикаллиқниң күчийишини илгири сүриду» дейилгән.

Униң 23‏-апрел елан қилинған баянатида: «хитай һөкүмитиниң уйғур вә башқа аз санлиқ мусулман милләтләрни бастуруши вә кәң көләмлик қамиши универсал кишилик һоқуқ хитапнамисиниң 3‏-, 10‏-, 18‏-маддилиридики кишилик һоқуқниң универсаллиқи вә тартивелишқа болмайдиғанлиқиға даир бәлгилимиләрни дәпсәндә қилиштур» дейилгән. Америка ташқи ишлар министирлиқиниң юқириқи икки баянати, хитайниң 25‏-апрел бейҗиңда башланған  « бир бәлвағ бир йол» хәлқара һәмкарлиқ йиғини һарписида елан қилинған. Бу қетимқи йиғинға ғәрбтики демократик дөләт рәһбәрлириниң асасән һечбири қатнашмиған иди.
Пикирләр (0)
Share
Толуқ бәт