Prézidént tramp amérika-xitay soda kélishimining 15‏-yanwar aqsarayda imzalinidighanliqini bildürdi

Muxbirimiz erkin
2019-12-31
Élxet
Pikir
Share
Print

Amérika prézidénti donald tramp 31‏-dékabir küni twittérda uchur yollap, 1‏-basquchluq amérika-xitay soda söhbitining 15‏-yanwar küni aqsarayda imzalinidighanliqini bildürgen. Uning ashkarilishiche, 15‏-yanwardiki kélishim imzalash murasimigha ali derijilik bir xitay emeldari qatnishidiken. U, kélishim imzalan'ghandin kéyin özining béyjinggha bérip, 2‏-basquchluq amérika-xitay soda söhbiti bashlaydighanliqini bildürgen. Lékin, prézidént tramp aqsaraydiki murasimgha xitayning qaysi ali derijilik rehbiri qatnishidighanliqini tilgha almighan.

Amérika taratqulirida, murasimgha xitayning bash soda söhbet wekili, mu'awin xitay bash ministiri lyu xéning qatnishishi mumkinliki ilgiri sürülmekte. Tramp memuriyiti buningdin ikki hepte awwal xitay bilen 1‏-basquchluq soda kélishimni hasil qilghanliqini élan qilghan. 1‏-Basquchluq mezkur kélishim "Uyghur kishilik hoquq qanun layihesi" améraka awam palatasida maqullinip, jumhuriyetchiler köp sanliqni igileydighan kéngesh palatasining maqullishigha sunulghan mezgilde hasil qilin'ghan. Bu mezgilde yene amérikidiki Uyghurlar qanun layihesining dékabir éyi ichide awazgha qoyulushini telep qilip, dölet mejliside Uyghur heptiliki pa'aliyiti élip barghan. 

Lékin, qanun layihesi kéngesh palatasining xizmet teripi seweblik 12‏-ay ichide awazgha qoyulmighan. Soda kélishimining "Uyghur kishilik hoquq qanun layihesi" ge qandaq tesir qilidighanliqi melum emes. Lékin, "Nyu-york waqti" gézitining 30 dékabir küni bergen xewiride tekitlinishiche, nöwette kéngesh palatasidiki jumhuriyetchi we démokratlar qanun layihesini 2020‏-yili mutleq köp awaz bilen maqullap, prézidéntning ret qiliwétishi éhtimalliqining aldini élishqa heriket qilmaqta iken. Prézidént tramp 31‏-dékabirdiki twittér sözide 1‏-basquchluq soda kélishimini "Intayin chong hem etrapliq kélishim" dep teswirligen. Aq sarayning soda meslihetchisi pétér nawaro tünügün kélishimning bir-ikki hepte ichide imzalinidighanliqi, uning eqliy mülk hoquqini qoghdashni öz ichige élipla qalmay, téxnika ötünüp bérishke mejburlash mesilisi üchünmu "Yaxshi bir bashlinish" bolghanliqini bildürgenidi.

Toluq bet