Amérika hökümiti resmiy türde amérika-xitay soda urushigha bel baghlidi

Muxbirimiz eziz
2018-08-03
Élxet
Pikir
Share
Print

Amérika bilen xitay otturisidiki soda urushining qiqas-sürenliri toxtimaywatqanda amérika hökümiti özining bu "Is-tüteksiz urush" qa resmiy teyyarliq qiliwatqanliqini körsitishke bashlidi. Birleshme agéntliqning 3-awghusttiki xewiride éytilishiche, xitay bilen bolghan bu qétimliq rehimsiz soda urushida özini küchlendürüsh üchün amérika hazir dostliri bilen bolghan munasiwetni yéngiwashtin ongshimaqta iken.

2‏- We 3-‏awghust künliri amérika bilen méksika terepning wekilliri washin'gton shehiride "Shimaliy amérika erkin soda kélishimi" ni yéngiwashtin yézip chiqish bilen aldirash bolghan. Bu kélishimni qayta yézip chiqish ishigha kanada hökümitimu ishtirak qilidiken. Melum bolushiche, buningdin birnechche ay burun bu kélishimning sürüki toshup ketken iken. Ötken hepte bolsa aq saray yawropa ittipaqi bilen bolghan aptomobil we zapchaslargha munasiwetlik sodida körülgen majirani toxtitishni qarar qilghan. Bu memliketler bilen bolghan sodining rawanliship kétishi mahiyette amérikining xitaygha éksport qiliwatqan yéza igilik mehsulatliri üchün yéngi bazar échilghanliqqa barawer bolidiken.


Aq saray xitaydin import qilinidighan 200 milyard amérika dolliriliq tawargha 25 pirsentlik tamozhna béji qoyush teklipini otturigha qoyghandin kéyin xitay pulining kursi zor tesirge uchrighan. Roytérs agéntliqining 3-awghusttiki xewiride éytilishiche, bu yil apréldin buyan chet'el bazarlirida "Xelq puli" ning kursi on pirsent chüshken.

Xitay hökümiti nöwette bu ehwalgha qarita öch almaqchi ikenlikini dawrang qiliwatqan bolup, xitaygha éksport qiliniwatqan 60 milyard amérika dolliri qimmitidiki amérika mallirigha 25 pirsent tamozhna béji qoyidighanliqini jakarlighan. Halbuki xitayning amérikigha qiliwatqan éksporti uning amérikidin qiliwatqan importidin zor derijide éship ketken iken. Aq sarayning axbarat katipi sara sandérs bu heqte toxtilip "Öch alimen dégüche xitay hökümiti tengsiz soda munasiwitini onglashqa zéhin qoysa özige yaxshi bolar idi" dégen.

Toluq bet