Amérika bilen xitay otturisidiki soda urushida xitayning muqerrer utturiwétidighanliqi tilgha élinmaqta

Muxbirimiz qutlan
2018-07-30
Élxet
Pikir
Share
Print

Amérika bilen xitay otturisidiki soda urushining keskinlishishige egiship, xitayning éksport mehsulatlirining qattiq sinaqqa duch kéliwatqanliqi, xitay iqtisadida körünerlik halsirash alametlirining körülüwatqanliqi melum bolmaqta.

"Wal-strit zhurnili" gézitining 27-iyuldiki sanida "Xitay tramp bilen bolghan soda urushida utturmaqta" serlewhilik bash maqale élan qilin'ghan.

Maqalide amérika prézidénti tramp ötken charshenbe küni yawropa komissiyonining prézidénti jé'an klawdé junkér bilen körüshkende gerche xitayning namini biwasite tilgha almighan bolsimu, emma "Adaletsiz soda emeliyiti" dégen söz arqiliq roshen halda xitayni ima qilghanliqi körsitilgen. Maqalida amérika bilen yawropa ittipaqi otturisidiki hemkarliqning xitayning qoghdinish modélini yimirip tashlaydighanliqi, hetta mezkur kélishimdin ilgirila bir qisim pakitlarning xitayning alliqachan aq bayraq chiqirishqa mejbur boluwatqanliqini körsitip bériwatqanliqi bildürülgen.

Maqalida yene soda urushi bashlan'ghandin buyan xitay yüenining pul-mu'amile baziridiki qimmitining shiddet bilen töwenligenliki, xitay xelq bankisining bashliqi yi gangning köp xil qanallar arqiliq amérika terepke xitayning amérika bilen soda toqunushigha kirgüsi yoqluqidin bésharet bergenliki, zawutlarning xitaydin wiyétnam, bén'gal, filippin, hindistan we méksika qatarliq döletlerge köchüwatqanliqi birmu-bir sanap körsitilgen.

Maqalida 1980-yillarda amérika bilen sabiq sowétlar ittipaqi otturisidiki herbiy hazirliqlar musabiqiside amérika prézidénti ronald réganning qandaq qilip iqtisadiy jehettin sowét ittipaqini berdashliq bérelmeydighan haletke chüshürüp qoyghanliqi eslitilip, "Amérika xitay bilen bolghan soda urushida xuddi shuninggha oxshash usulda ghelibe qilidu," déyilgen.

Maqalining axirida yene xitayning yéqindin buyan hökümet axbaratlirida prézidént trampqa hujum qilidighan selbiy söz-ibarilerni ishlitishni toxtatqanliqi, buning roshen halda amérika bilen bolghan toqunushni peseytish istikining netijisi ikenliki körsitip ötülgen.

Toluq bet