Америка билән хитай оттурисидики сода урушида хитайниң муқәррәр уттуриветидиғанлиқи тилға елинмақта

Мухбиримиз қутлан
2018-07-30
Елхәт
Пикир
Share
Принт

Америка билән хитай оттурисидики сода урушиниң кәскинлишишигә әгишип, хитайниң експорт мәһсулатлириниң қаттиқ синаққа дуч келиватқанлиқи, хитай иқтисадида көрүнәрлик һалсираш аламәтлириниң көрүлүватқанлиқи мәлум болмақта.

«Вал-стрит журнили» гезитиниң 27-июлдики санида «хитай трамп билән болған сода урушида уттурмақта» сәрләвһилик баш мақалә елан қилинған.

Мақалидә америка президенти трамп өткән чаршәнбә күни явропа комиссийониниң президенти җеан клавде җункер билән көрүшкәндә гәрчә хитайниң намини биваситә тилға алмиған болсиму, әмма «адаләтсиз сода әмәлийити» дегән сөз арқилиқ рошән һалда хитайни има қилғанлиқи көрситилгән. Мақалида америка билән явропа иттипақи оттурисидики һәмкарлиқниң хитайниң қоғдиниш моделини йимирип ташлайдиғанлиқи, һәтта мәзкур келишимдин илгирила бир қисим пакитларниң хитайниң аллиқачан ақ байрақ чиқиришқа мәҗбур болуватқанлиқини көрситип бериватқанлиқи билдүрүлгән.

Мақалида йәнә сода уруши башланғандин буян хитай йүәниниң пул-муамилә базиридики қиммитиниң шиддәт билән төвәнлигәнлики, хитай хәлқ банкисиниң башлиқи йи гаңниң көп хил қаналлар арқилиқ америка тәрәпкә хитайниң америка билән сода тоқунушиға киргүси йоқлуқидин бешарәт бәргәнлики, завутларниң хитайдин вийетнам, бенгал, филиппин, һиндистан вә мексика қатарлиқ дөләтләргә көчүватқанлиқи бирму-бир санап көрситилгән.

Мақалида 1980-йилларда америка билән сабиқ советлар иттипақи оттурисидики һәрбий һазирлиқлар мусабиқисидә америка президенти роналд реганниң қандақ қилип иқтисадий җәһәттин совет иттипақини бәрдашлиқ берәлмәйдиған һаләткә чүшүрүп қойғанлиқи әслитилип, «америка хитай билән болған сода урушида худди шуниңға охшаш усулда ғәлибә қилиду,» дейилгән.

Мақалиниң ахирида йәнә хитайниң йеқиндин буян һөкүмәт ахбаратлирида президент трампқа һуҗум қилидиған сәлбий сөз-ибариләрни ишлитишни тохтатқанлиқи, буниң рошән һалда америка билән болған тоқунушни пәсәйтиш истикиниң нәтиҗиси икәнлики көрситип өтүлгән.

Пикирләр (0)
Share
Толуқ бәт