Amérika bilen xitay otturisidiki soda urushining nöwette pul-mu'amile urushigha ayliniwatqanliqi ilgiri sürülmekte

Muxbirimiz qutlan
2018-07-23
Élxet
Pikir
Share
Print

Amérika bilen xitay otturisidiki soda urushining jiddiylishishige egiship, tramp hökümitining xitay mehsulatlirigha qarita chégra béjini östürüsh pozitsiyisi barghanséri kücheymekte. Buningdin kélip chiqidighan muqerrer ziyanning alametliri xitayda alliqachan körülüshke bashlighan bir mezgilde xitayning "Pul-mu'amile sahesidimu qanunsiz oyun oynawatqanliqi" pash bolmaqta.

Roytérs agéntliqining bildürüshiche, prézidént trampning teklipi bilen amérika dölet xezinisining sékrétari stéwén mnuchin xitayning yéqindin buyanqi pul-mu'amile saheside oynawatqan bir qatar oyunlirigha yéqindin diqqet qilmaqtiken. Bash shtabi nyuyorktiki "Goldmen saks pul-mu'amile guruhi" ning analizchiliri ötken jüme küni öz xéridarlirini agahlandurup, "Soda urushi nöwette bir meydan pul-mu'amile urushigha aylandi," dégen.

Kanadada chiqidighan s b s xewer agéntliqining bildürüshiche, amérikining xitayning éksport mallirigha 25 pirsent baj qoyushi xitay iqtisadigha körünerlik tesir körsitip, xitay yüenining pul-mu'amile baziridiki qimmitini töwen'ge chüshürüwetken. Halbuki, xitay köz aldigha yéqinlap kéliwatqan iqtisadiy chöküshning waqitliq aldini élish üchün xelq'ara pul-mu'amile saheside yéngi oyunlarni oynawatqanliqi bilinmekte. Közetküchiler, amérika bilen xitay otturisidiki soda urushi yenimu keskinleshse "Iqtisad bilen qed kötürgen xitay impiriyesi" ning uzun'gha berdashliq bérelmey patqaqqa pétip qélish mumkinchilikini texmin qilmaqta.

Toluq bet