Президент трамп: «хитайниң америкиниң иш вә байлиқини оғрилишиға хатимә берилиши шәрт»

Мухбиримиз әркин
2019-02-06
Елхәт
Пикир
Share
Принт

Америка президенти доналд трамп сәйшәнбә күни америка хәлқигә нутуқ сөзләп, хитайниң америкиниң иш вә байлиқини оғрилишиға хатимә беридиғанлиқини билдүрди.

Униң илгири сүрүшичә, америкиниң хитай билән болған содида кәскин позитсийә тутуши бу мәқсәтни ишқа ашуруш икән. У йәнә, хитай билән болидиған сода келишими униң «қурулма характерлик өзгәртиш елип берип, содидики адаләтсизликкә хатимә беришини тәләп қилидиғанлиқи» ни билдүрди. Көзәткүчиләр, хитайниң иқтисади қурулмисини өзгәртмәсликкә қаттиқ тирәҗәватқанлиқини билдүрмәктә.

Бу қетимқи нутуқ президент трампниң вәзипигә олтурғандин бери дөләт мәҗлисидә америка хәлқигә сөзлигән2‏-қетимлиқ нутқидур. У юқириқи сөзләрни америка-хитай сода сөһбити келәр һәптә бейҗиңда өткүзүлүшиниң алдида қилди. Әгәр хитай америка билән бу айниң ахирлириға қәдәр сода келишими һасил қилалмиса1‏-март күни америка-хитай сода уруши қайта башлиниду.

Президент трамп сөзидә америкиниң хитайға қарита қаттиқ мәйданда туридиғанлиқини әскәртип, «биз хитайға шу нәрсини ениқ билдүрүватимиз, йиллардин бери давамлишип кәлгән америка санаитини нишанға елиш, бизниң әқлий мүлкимизни, америкиниң иш вә байлиқини оғрилашқа хатимә бериш вақти кәлди» дәп көрсәтти. Президент трампниң тәкитлишичә, хитай чоқум өзиниң иқтисади қурулмисини өзгәртиши керәк икән.

У: «биз һазир хитай билән сода келишимини сөзлишиватимиз. Лекин бу чоқум иқтисади қурулмини өзгәртип, содидики адаләтсизликкә хатимә беришни, бизниң содидики қизил рәқимини азайтишни вә америкилиқларниң иш пурситини қоғдашни өз ичигә елиши керәк» деди. Президент трамп билән хитай рәиси ши җинпиң өткән йили 12‏-айниң башлирида көрүшүп, сода урушини 90 күн тохтитишни қарар қилған. Президент трамп әгәр хитай бу 90 күн ичидә америка билән келишим һасил қилмиса, хитай мәһсулатлириға баҗни көпәйтидиғанлиқини билдүргән. Мәлум болушичә, америка өткән йили хитайниң 250 милярд долларлиқ импорт мәһсулатиға баҗ қойған.

Пикирләр (0)
Share
Толуқ бәт