Jumhuriyetchiler xitaygha taqabil turush üchün istratégiye doklati teyyarlighan

Muxbirimiz jüme
2020-06-14
Élxet
Pikir
Share
Print

Amérika dölet mejlisidiki jumhuriyetchiler "Xitay kompartiyesining amérikaning ulini kolash, dunya tertipini qayta tüzüp chiqish hemde gheyriy shekildiki hakimiyet endizisini terghib qilish urunushi" gha taqabil turush üchün bir istratégiye doklati teyyarlighan.

120 Betlik mezkur dölet xewpsizliki istratégiyesi doklati amérika dölet mejlisining 147 neper ezasini öz ichige alghan jumhuriyetchiler tetqiqat komitéti teripidin 10-iyun élan qilin'ghan.

Doklatta xitay siyasiy byurosi, xitay kompartiyesi merkiziy komitéti ezaliri we xitay xelq qurultiyining barliq wekillirige émbargo qoyush teklipi bérilgen.

Doklatqa qarighanda bu cheklimiler ularning barliq a'ile tawabi'atlirigha qaritilghan bolup, eger shu boyiche bolghanda, cheklime qoyulghan hökümet emeldarlirining perzentlirining amérikida oqushimu cheklinidiken.

Doklatta mundaq déyilgen: "Xitay yéqini nechche on yilidin béri herxil mekkarliqlarni ishlitip amérika we bashqa gherb ellirige tewe eqliy mülüklerni oghrilidi. Shuni tekitlesh lazimki, xitay amérikigha qarishi iqtisadiy jasusluq heriketliri élip bériwatqan shara'itta xitay yuqiri derijilik hökümet erbabliri we ularning a'ile tawabi'atliri amérikida oquyalmasliqi kérek."

Doklatta yene, Uyghur éli, tibet we xongkongda kishilik hoquq depsendichiliki bilen shughulliniwatqan hökümet erbablirighimu émbargo qoyush teklipi bérilgen. 

Bularning arisida xitay siyasiy byurosining shinjang xizmitige mes'ul da'imiy ezasi wang yang, Uyghur aptonom rayonining partiye sékrétari chén chu'en'go we tibet aptonom rayonining partkom sékrétari xen jéng qatarliqlar alahide közge chéliqidu.

Uningdin bashqa amérika dölet mejlisi yéqinda "Uyghur kishilik hoquq siyasiti qanuni" namliq bir kishilik hoquq qanuni maqullighan we uni amérika prézidéntining imzalishigha yollighan idi. 

Doklatta mundaq déyilgen: "Xitay gheyriy shekildiki hakimiyet endizisini hedep terghib qiliwatqan shara'itta, amérika qoshma shtatliri özimizning erkinlik, démokratiye we kishilik hoquq qimmet qarashlirimizgha xitay tehditige taqabil turush istratégiyemizning muhim bir qismi süpitide téximu ehmiyet bérishimiz kérek."

Toluq bet