Aq saray, amérikaning tébbiy lawazimetlerde xitaygha tayinishigha xatime bérishni qarar qilghan

Muxbirimiz erkin
2020-03-13
Élxet
Pikir
Share
Print

Aq saray amérikaning tébbiy lawazimetlerde xitaygha tayinish ehwaligha xatime bérishni qarar qilghan. Aq sarayning soda-iqtisad meslihetchisi pétir nawaro hökümetning tibbiy lawazimetlerde chet'elge tayinip qélish ehwaligha xatime bérish üchün bir memuriy buyruq hazirlawatqanliqini delilligen.

Tramp hökümitining bu qarari amérika kéngesh palata ezaliri tébbiy lawazimette xitaygha tayinip qélish weziyitige qarita jiddiy endishilirini otturigha qoyuwatqan mezgilde chiqirildi. Amérika kéngesh palatasining bezi ezaliri ötken seyshenbe küni prézidént tramp bilen körüshüp, özlirining bu jehettiki endishisini ipadiligen. Kéngesh palata ezasi marku rubi'o prézidént tramptin kéngesh palatasining "Dorigerlik we tbi'iy lawazimetlerning teminat menbesini köp xillashturush toghrisidiki pilanini qollishi" ni telep qilghan. Amérikaning anti-bi'otik we tébbiy lawazimetlerde heddidin ziyade xitaygha tayinishi, uning xitaydin tarqalghan korona wirusigha taqabil turushigha belgilik qiyinchiliq élip kelgen. 

Melum bolushiche, amérika anti-bi'otik dorilirining 90 % ni xitaydin import qilidiken. Lékin xitay bu qétimqi wirusta maska qatarliq bezi tébbiy lawazimetlirining amérikagha éksport qilinishini chekligen. "Nyu-york waqti" gézitining bildürüshiche, pétir nawaro "Xitay bashqa sahelerde adaletsiz soda wastilirini qollan'ghandek teminat sahesidimu bu xil usulni qollanmaqta" dégen. Pétir nawaroning bildürüshiche, hökümetning qarari kéler heptilerde élan qilinidiken. Nawaro "Prézidént tramp éytqandek bizning bu sahediki ishlepchiqirishni amérikagha qayturup kélip, ammiwiy sehiye, iqtisad we dölet bixeterlikini qoghdushimiz kérek" dégen.

Toluq bet