Америка ширкитиниң хотәндики «тәйда ширкити» билән алақисини үзүши хитайни нарази қилди

Мухбиримиз ирадә
2019-01-10
Елхәт
Пикир
Share
Принт

Йеқинда америкидики баҗер тәнтәрбийә кийимлири ширкити хотәндики йиғивелиш лагерлирида тутқунларни мәҗбурий әмгәккә селиватқан «тәйда һәссидарлиқ чәклик ширкити» ниң тәнтәрбийә кийимлирини импорт қилип, америкида базарға салған. Бу вәқә ашкариланғандин кейин күчлүк инкас пәйда қилған иди.

Бирләшмә агентлиқиниң хәвәр қилишичә, чаршәнбә күни юқириқи бу америка ширкити өзиниң тор бетидә рәсмий бир баянат елан қилиш арқилиқ өзлириниң хотәндики «тәйда ширкити» билән болған барлиқ алақисини үзгәнликини вә бундин кейин уйғур елидин һечқандақ мал импорт қилмайдиғанлиқини җакарлиған. 

Адәттә шеркәтләр арисидики сода мәсилилиригә инкас билдүрмәйдиған хитай ташқи ишлар министирлиқи болса америка ширкитиниң бу қарариға сүкүт қилип туралмиған. Хитай ташқи ишлар министирлиқиниң баянатчиси лу каң пәйшәнбә күни «америка ширкитиниң хата мәлуматларға ишинип бундақ қарар елишини мән бичарилиқ дәп қараймән» дейиш арқилиқ америка ширкитиниң бу қарарға наразилиқ билдүргән. 

Америкиниң баҗир ширкити импорт қилған кийимләрниң хотәндики лагерларда ишләп чиқирилғанлиқ хәвири «нюйорк вақти гезити», «малийә вақти гезити» қатарлиқ дунядики нопузлуқ агентлиқлар вә, гезитләрдә ашкарилинип, зор ғулғула қозғиған вә нурғун университетлар баҗер ширкитиниң мәктәп дуканлиридики тәнтәрбийә кийимлирини йиғивәткән. Америка һөкүмәт тармақлириму мәзкур вәқә үстидин тәкшүрүш башлиған иди.

Пикирләр (0)
Share
Толуқ бәт