Amérika armiyisining afghanistandin esker chékindürüsh qarari xitayni bi'aram qilmaqta

Muxbirimiz eziz
2019-01-01
Élxet
Pikir
Share
Print

Amérika prézidénti donald tramp afghanistanda turushluq 14 ming amérika armiyisini muddetke bölüp chékindürüp chiqish buyruqigha imza qoyghandin kéyin xitay hökümiti buningda "Mes'uliyetchanliq bilen chékinish" ning muhimliqini alahide tekitleshke bashlighan.

Xitayning pakistanda turushluq mu'awin bash elchisi jaw lijyen pakistan téléwiziyisige söz qilip, "Taliban bilen afghanistan hökümiti derqemte turup urushtin qalghan mesililerni muwapiq hel qilishi lazim" dégen. Shuningdek amérika armiyisi qoshun chékindürüp chiqip ketkendin kéyin afghanistan hökümiti bilen talibanlar otturisidiki urushning yéngiwashtin ewj élishidin qattiq endishe qiliwatqanliqini bildürgen. U bu heqte qilghan sözide "Ichki urush qaytidin bashlansa uning tesirige uchraydighini aldi bilen biz we pakistandur" dep körsetken.

Jaw lijyen bu heqtiki sözining dawamida afghanistandiki qoralliq guruhlarning Uyghurlar diyaridiki térrorluq heriketlirige astirtin hemdem bolushidin bekrek endishe qiliwatqanliqini ashkara éytqan. Bolupmu u "Sherqiy türkistan islam herikiti" namliq teshkilatni "Shinjangni bizdin ayrip musteqil qilmaqchi. Hökümitimiz buninggha hergizmu yol qoymaydu" dep eyibligen. Muxbirlarning Uyghurlar duch kéliwatqan siyasiy basturushlar heqqidiki so'allirigha qarita jaw lijyen "Bu pütünley gherb dunyasining birtereplime melumatliri" dep jawab bergen.

Nöwette közetküchiler bu heqte pikir qilip "Amérika armiyisi afghanistandin chékinip chiqsa talibanni kontrol qilish afghanistanning hazirqi hökümiti üchün bir chong xiris bolup qélishi mumkin. Qachaniki taliban qaytidin zoriyip hökümettin qudretlik bolup ketse, u halda afghanistan qaytidin urush otigha pétip qélishi mumkin" déyishmekte iken.

Toluq bet