Америка армийисиниң афғанистандин әскәр чекиндүрүш қарари хитайни биарам қилмақта

Мухбиримиз әзиз
2019-01-01
Елхәт
Пикир
Share
Принт

Америка президенти доналд трамп афғанистанда турушлуқ 14 миң америка армийисини муддәткә бөлүп чекиндүрүп чиқиш буйруқиға имза қойғандин кейин хитай һөкүмити буниңда «мәсулийәтчанлиқ билән чекиниш» ниң муһимлиқини алаһидә тәкитләшкә башлиған.

Хитайниң пакистанда турушлуқ муавин баш әлчиси җав лиҗйән пакистан телевизийисигә сөз қилип, «талибан билән афғанистан һөкүмити дәрқәмтә туруп уруштин қалған мәсилиләрни мувапиқ һәл қилиши лазим» дегән. Шуниңдәк америка армийиси қошун чекиндүрүп чиқип кәткәндин кейин афғанистан һөкүмити билән талибанлар оттурисидики урушниң йеңиваштин әвҗ елишидин қаттиқ әндишә қиливатқанлиқини билдүргән. У бу һәқтә қилған сөзидә «ички уруш қайтидин башланса униң тәсиригә учрайдиғини алди билән биз вә пакистандур» дәп көрсәткән.

Җав лиҗйән бу һәқтики сөзиниң давамида афғанистандики қораллиқ гуруһларниң уйғурлар дияридики террорлуқ һәрикәтлиригә астиртин һәмдәм болушидин бәкрәк әндишә қиливатқанлиқини ашкара ейтқан. Болупму у «шәрқий түркистан ислам һәрикити» намлиқ тәшкилатни «шинҗаңни биздин айрип мустәқил қилмақчи. Һөкүмитимиз буниңға һәргизму йол қоймайду» дәп әйиблигән. Мухбирларниң уйғурлар дуч келиватқан сиясий бастурушлар һәққидики соаллириға қарита җав лиҗйән «бу пүтүнләй ғәрб дунясиниң биртәрәплимә мәлуматлири» дәп җаваб бәргән.

Нөвәттә көзәткүчиләр бу һәқтә пикир қилип «америка армийиси афғанистандин чекинип чиқса талибанни контрол қилиш афғанистанниң һазирқи һөкүмити үчүн бир чоң хирис болуп қелиши мумкин. Қачаники талибан қайтидин зорийип һөкүмәттин қудрәтлик болуп кәтсә, у һалда афғанистан қайтидин уруш отиға петип қелиши мумкин» дейишмәктә икән.

Пикирләр (0)
Share
Толуқ бәт