Tillérson amérikining shimaliy koréye bilen sözlishidighan alaqe qanili barliqini éytti

Muxbirimiz jüme
2017-09-30
Élxet
Pikir
Share
Print

Xitayda ziyarette boluwatqan amérika dölet ishlar ministiri tillérson shenbe küni amérikining shimaliy koréye hökümiti bilen biwasite sözlishidighan alaqe qanili barliqini ashkarilidi.

U, shimaliy koréye bilen qandaq söhbet qurush mesilisi heqqidiki so'allargha jawab bérip mundaq dédi: "Biz bu heqte izdiniwatimiz. Sözlishemsen? dep soraymiz. Bizning piyongyang bilen alaqe qilidighan qanallirimiz bar. Biz peqet qarangghu halette qalghan emes."

U yene amérikining piyongyang da'iriliri bilen biwasite alaqe qilidighan üch qanili barliqini barliqini bildürdi.

"Nyu-york waqit géziti" ning xewer qilishiche, amérika we shimaliy koréye arisidiki biwasite alaqe qanilining qandaq netijide béridighanliqini hazirche mölcherlesh qiyin iken.

Xewerge qarighanda, donald tramp shimaliy koréye söhbitide héchqandaq sülhi-salagha yol qoymaydighanliqini bildürgen. Kim jung'unmu özining barliq yadro qoralliridin waz kéchish telep qilin'ghan herqandaq söhbetni ret qilidighanliqini ilgiri sürgen.

Hazirche kim jung'un hökümitining qandaq shekildiki söhbetke hazirliq körüwatqanliqini bildüridighan héchqandaq alamet yoq iken.

Yéqindin buyan amérika-shimaliy koréye munasiwetliri intayin jiddiy ehwalgha chüshüp qalghan.

Amérika prézidénti donald tramp shimaliy koréyening yadro bomba tehditige inkas qayturup shimaliy koréyeni kumpeykum qiliwétidighanliqini bildürgen.

Ikki terep arisidiki söz urushi dawam qiliwatqan peytlerde shimaliy koréye 3-séntebir bir hidrogén bombisini sinaq qilghan.

Bu sinaq b d t ning qattiq eyiblishige uchrighan we shimaliy koréyege yene bir qatar éghir iqtisadiy jaza élan qilin'ghan.

Xitay peyshenbe künidiki bayanatida shimaliy koréyening xitayda meshghulat qiliwatqan shirketlirini 120 kün ichide taqaydighanliqini bildürgen.

Tillérson özining 2-qétimliq xitay ziyaritini peyshenbe küni bashlighan idi.

Toluq bet