Amérika hökümiti shimaliy koréyege yene iqtisadiy cheklime qoydi

Muxbirimiz jüme
2018-02-24
Élxet
Pikir
Share
Print

Amérika hökümiti jüme küni shimaliy koréyege qarita yene bir qatar éghir iqtisadiy cheklimilerni élan qildi.

Amérika maliye ministiri stéw mnyuchin bu heqte élan qilghan bayanatida, bu qétimqi cheklimilerning kim jung'un réjimining "Xeterlik qoral programmisini meblegh bilen teminlep kelgen saxta transport qilmishlirini nishan qilghan" liqini bildürdi.

U yene bu cheklimining shimaliy koréye bilen alaqidar bir adem, 27 shirket we 28 dane paraxotni öz ichige alghan dunyaning her qaysi jayliridiki soda we transport shirketlirini nishan qilghanliqini bildürdi.

U mundaq dédi: "Bügünki cheklimiler shimaliy koréyening déngizdiki qanunsiz kömür we néfit toshush ishlirigha yar-yölek bolidighan heriketlerni körünerlik tosqunluqqa uchritidu we ularning ochuq déngizda mehsulat toshush iqtidarini berbat qilidu."

Xewerlerge qarighanda, amérika hökümiti bu nöwet cheklime élan qilghan shirket we paraxotlar shimaliy koréye, xitay, sin'gapor, xongkong, teywen qatarliq dölet we rayonlargha jaylashqan iken. 

Mnyuchin yene bu cheklime arqiliq dunyadiki barliq ellerge uchur béridighanliqi, bu cheklimidin kéyinmu shimaliy koréye bilen soda qilghan herqandaq shexs we shirket bayqalsa, bularning amérika bilen soda qilishigha yol qoyulmaydighanliqini alahide tekitlidi.

Jüme küni washin'gtonda ötküzülgen bir konsérwatip siyasiyonlarning yighinda sözligen amérika prézidénti donald trampmu shimaliy koréyege qoyulghan bu nöwetlik cheklimining "Ilgiri körülüp baqmighan derijide éghir" ikenlikni, buning bir yaxshi netije bérishige tilekdash ikenlikini bildürdi.

Melum bolushiche, xitay shimaliy koréye bilen normal soda munasiwitini saqlap kelgen we shimaliy koréyege néfit qatarliq énérgiye mehsulatlirini satidighan birdin bir dölet iken.

Bir nechche hepte ilgiri amérika prézidénti donald tramp twittérgha yollighan uchurida, xitayning iqtisadiy cheklimilerge qarimay shimaliy koréyege néfit sétishni toxtatmighanliqini eyibligen.

B d t 5-yanwarda élan qilghan yéngi iqtisadiy cheklime boyiche, xitay shirketliri shimaliy koréyege éksport qilghan xam néfit yiligha 4 milyon tungdin, bénzin 500 ming tungdin éship ketmesliki kérekliki körsitilgen.

Bu nöwetlik cheklimining xitayning shimaliy koréye bilen bolghan sodisigha yene qandaq zerbilerni béridighanliqi hazirche namelum.

Toluq bet