Америка һөкүмити шималий корейәгә йәнә иқтисадий чәклимә қойди

Мухбиримиз җүмә
2018-02-24
Елхәт
Пикир
Share
Принт

Америка һөкүмити җүмә күни шималий корейәгә қарита йәнә бир қатар еғир иқтисадий чәклимиләрни елан қилди.

Америка малийә министири стев мнючин бу һәқтә елан қилған баянатида, бу қетимқи чәклимиләрниң ким җуңун реҗиминиң «хәтәрлик қорал программисини мәбләғ билән тәминләп кәлгән сахта транспорт қилмишлирини нишан қилған» лиқини билдүрди.

У йәнә бу чәклиминиң шималий корейә билән алақидар бир адәм, 27 ширкәт вә 28 данә парахотни өз ичигә алған дуняниң һәр қайси җайлиридики сода вә транспорт ширкәтлирини нишан қилғанлиқини билдүрди.

У мундақ деди: «бүгүнки чәклимиләр шималий корейәниң деңиздики қанунсиз көмүр вә нефит тошуш ишлириға яр-йөләк болидиған һәрикәтләрни көрүнәрлик тосқунлуққа учритиду вә уларниң очуқ деңизда мәһсулат тошуш иқтидарини бәрбат қилиду.»

Хәвәрләргә қариғанда, америка һөкүмити бу нөвәт чәклимә елан қилған ширкәт вә парахотлар шималий корейә, хитай, сингапор, хоңкоң, тәйвән қатарлиқ дөләт вә районларға җайлашқан икән. 

Мнючин йәнә бу чәклимә арқилиқ дунядики барлиқ әлләргә учур беридиғанлиқи, бу чәклимидин кейинму шималий корейә билән сода қилған һәрқандақ шәхс вә ширкәт байқалса, буларниң америка билән сода қилишиға йол қоюлмайдиғанлиқини алаһидә тәкитлиди.

Җүмә күни вашингтонда өткүзүлгән бир консерватип сиясийонларниң йиғинда сөзлигән америка президенти доналд трампму шималий корейәгә қоюлған бу нөвәтлик чәклиминиң «илгири көрүлүп бақмиған дәриҗидә еғир» икәнликни, буниң бир яхши нәтиҗә беришигә тиләкдаш икәнликини билдүрди.

Мәлум болушичә, хитай шималий корейә билән нормал сода мунасивитини сақлап кәлгән вә шималий корейәгә нефит қатарлиқ енергийә мәһсулатлирини сатидиған бирдин бир дөләт икән.

Бир нәччә һәптә илгири америка президенти доналд трамп твиттерға йоллиған учурида, хитайниң иқтисадий чәклимиләргә қаримай шималий корейәгә нефит сетишни тохтатмиғанлиқини әйиблигән.

Б д т 5-январда елан қилған йеңи иқтисадий чәклимә бойичә, хитай ширкәтлири шималий корейәгә експорт қилған хам нефит йилиға 4 милйон туңдин, бензин 500 миң туңдин ешип кәтмәслики керәклики көрситилгән.

Бу нөвәтлик чәклиминиң хитайниң шималий корейә билән болған содисиға йәнә қандақ зәрбиләрни беридиғанлиқи һазирчә намәлум.

Пикирләр (0)
Share
Толуқ бәт