Америка NPR радийосиниң A1 программисида уйғурлар мәсилиси муһакимә қилинди

Мухрибримиз ирадә
2019-12-26
Елхәт
Пикир
Share
Принт

Америкадики нопузлуқ таратқулардин NPR радийоси йәни америка дөләтлик аммивий радийосиниң 23- декабирдики «1A» радийо программисида уйғур мәсилиси йәнә бир қетим тонуштурулди.

Бу программиға «ню-йорк вақти гезити» ниң хоңкоңда турушлуқ мухбири астин рәмзий, америкадики «шәрқий түркистан миллий ойғиниш һәрикити» ниң қурғучиси салиһ худаяр вә шундақла уйғур кишилик һоқуқ қурулушиниң ташқий мунасивәтләр мудири луиса гирив қатарлиқлар тәклип қилинған.

Программа риясәтчиси алди билән хитай һөкүмитиниң уйғур елидики «қайта тәрбийә» лагерлирини дуняға «мәктәп» дәп тонуштуруватқан болсиму, әмма һазирғичә ашкарилиниватқан пакитларда бу орунларда қейин - қистақ, өлүм вә башқа зулум вастилири барлиқиниң мәлум болғанлиқини баян қилиду.

Андин риясәтчи салиһ худаярни радийо аңлиғучиларға йеңидин тәшкилләнгән «шәрқий түркистан сүргүн һөкүмити» баш министири вә шуниң билән бир вақитта «шәрқий түркистан миллий ойғиниш һәрикити» ниң қурғучиси, дәп тонуштуриду. Риясәтчи йәнә чәтәлләрдики мустәқиллиқ паалийәтчилириниң хитайдики «шинҗаң» районини «шәрқий түркистан» дәп атайдиғанлиқиниму тәкитләп өтиду.

Мәзкур программида сөзгә тәклип қилинған юқириқи кишиләр хитай һөкүмитиниң 1949- йилидин бери уйғур елида йүргүзүп кәлгән сиясәтлири, һазирқи лагер түзүми, хитайниң бу залим сиястини йошуруш үчүн чәтәлләрдә елип барған тәшвиқат һәрикәтлири һәм шундақла йеқинда ашкариланған хитайниң  мәхпи һөҗҗәтлири қатарлиқ ноқтилардин туруп шәрһилиди.

Программа риясәтчиси йәнә бу программиға хитайниң америкадики баш әлчиси тәклип қилинған болсиму, бирақ улардин бир җавап кәлмигәнликини әскәртип өтти.

Пикирләр (0)
Share
Толуқ бәт