Amérikaning yéngi "Dölet mudapiye ijazet qanuni" da bir qisim xitay mu'esselirige cheklime qoyuldi

Muxbirimiz irade
2019-12-26
Élxet
Pikir
Share
Print

Amérika hökümiti yéqinda dölet mudapiye eslihelirini sétiwélishqa munasiwetlik bolghan "Dölet mudapiye ijazet qanuni" ni maqullighan idi. Birleshme agéntliqining bu heqtiki xewirige qarighanda, bu nöwet maqullan'ghan yéngi qanunda xitaygha munasiwetlik bir qanche muhim maddilar bar bolup, ular dölet maliyesini ishlitip, xitaydin aptobos we wagon qatarliqlarni sétiwélishni cheklesh hem shundaqla xu'awéy shérkitige qoyulghan jaza tedbirini bikar qilmasliqni teshebbus qilidighan bir qatar maddilarni öz ichige alidiken. Melum bolushiche, "Dölet mudapiye ijazet qanuni" da yuqiriqi bu mehsulatlarning amérika dölet mudapiyesi üchün xewp peyda qilidighanliqi qeyt qilin'ghan.

Yuqiriqi bu cheklimilerning élan qilinishi del xitay bilen amérika ikki yilliq soda urushidin kéyin tunji qétim waqitliq kélishim hasil qilghan mezgilge toghra kelgen.

Xitay terep buninggha derhal naraziliqini ipade qilghan. Xitay soda ministirliqining bayanatchisi gaw féng 26- dékabir künidiki bayanatida "Biz amérikaning yéngi 'dölet mudapiye ijazet qanuni' da xitayning bir qisim mu'esseselirige qarshi bir tereplime qarash barliqini bayqiduq. Biz buninggha qet'iy qarshi turimiz we buninggha qarshi tedbirlerni alimiz" dégen.

Yuqiriqi qanunda xitayning dölet igidarchiliqidiki poyiz yasash shérkiti "CRRC" bilen "BYD MOTORS" namliq tokluq aptobos yasaydighan shérkitining mehsulatlirini kirgüzüshni chekleshtin bashqa yene amérika hökümitini teywen bilen bolghan alaqisini kücheytishni we xongkongdiki démokratik namayishlarni qollashni teshebbus qilidighan maddilarmu bar iken. Xitay terep bolsa buni "Xitayning ichkiy ishlirigha arilashqanliq," dep tenqidligen.

Toluq bet