Уйғур вә қазақлар хитайниң мәмликәтлик челиш мусабиқисида 5 алтун медал алди

Мухбиримиз әркин
2018-07-09
Елхәт
Пикир
Share
Принт

Өткән һәптә хитайниң хәйнән өлкисидә өткүзүлгән хитай мәмликәтлик яшлар челиш мусабиқисида уйғур вә қазақ челишчилар 5 алтун медал, 2 мис медал алған.

Хитайниң 2018‏-йиллиқ мәмликәтлик яшлар челиш мусабиқиси 6‏-июл башланған болуп, уйғур районидин 9 нәпәр маһир қатнашқан иди. юқириқи маһирлар уйғур җәмийити қаттиқ қамал астиға елинип, аз дегәндә бир милйон уйғур йиғивелиш лагерлириға қамилиштәк бир вәһиминиң бесими астида юқириқи нәтиҗигә еришкән.

Кишилик һоқуқ тәшкилатлириниң илгири сүрүшичә, хитай һөкүмити «идийәси хата» дәп қаралған язғучи, сәнәтчи, тиҗарәтчи, диний өлима, зиялий вә җамаәт әрбаблирини яки чәтәлгә чиққан адәттики пуқраларни бу лагерларға қамап, лагердики тутқунларни өзиниң диний етиқади, тарихий, мәдәнийити вә әнәнилиридин ваз кечишкә, уни «қалақ» дәп әйибләшкә мәҗбурлимақтикән.

Даириләр бу йилниң башлирида атақлиқ уйғур путбол чолпини ирфан һезимни тутқун қилип, дөрбилҗиндики бир йиғивелиш лагериға қамиған. Бу хәлқарада қаттиқ ғулғула қозғап, хәлқара путболчилар җәмийити баянат елан қилған. Улар баянатида, ирфан һезимниң дәрһал қоюп берилишини тәләп қилған иди.

«Үрүмчи кәчлик гезити» ниң хәвәр қилишичә, хәйнәндә өткүзүлгән бу қетимқи челиш мусабиқисигә пүтүнләй 23 яштин төвән яшлар қатнашқан. Мусабиқидә сәлтәнәт еринбек қизларниң 60 килограмлиқлар, җәңәр нурлан әрләрниң 67 килограмлиқлар, сулайман ғопур 77 килограмлиқлар җадиқ җунус 97 килограмлиқлар вә абдусәмәт һеким 87 килогирамлиқлар бойичә рәқиплирини йеңип, алтун медал алған. Мусабиқиниң 72 килогирамлиқлар вә 130 килограмлиқ түридә ширәли турсун вә қавсар төләвқан мис медал алған.

«Үрүмчи кәчлик гезити» ниң хәвәр қилишичә, челишчилар әтритиниң тренири алим кирәм хитай ахбарат вастилириға қилған сүзидә челишчиларниң нәтиҗисини муайәнләштүрип, «бизниң челишчилиримиз бурунқи мусабиқиләрдики тәҗрибә савақларни йәкүнләп, өзлириниң техникисини мувапиқ тәртипкә салди. Мәшқ җәрянида мудапиәгә тақабл туруш җәһәттики мәшқни күчәйткән идуқ» дегән.

Пикирләр (0)
Share
Толуқ бәт