Қумул зиялийлири абдуреһим өткүрни хатирилиди

Мухбиримиз үмидвар
2015-09-20
Елхәт
Пикир
Share
Принт

Қумулдики уйғур зиялийлири мәшһур уйғур язғучиси вә алими абдуреһим өткүр вапатиниң 20 йиллиқи мунасивити билән хатириләш паалийити өткүзди.

Абдуреһим өткүр аилисиниң язғучи вапатиниң 20 йиллиқи мунасивити билән өткүзгән нәзир-хәтмә қуран қилиш мурасими қоюқ хатириләш мурасим түсини алған болуп, қумул шәһиридики орда ресторанида 19- сентәбир күни өткүзүлгән мәзкур паалийәткә абдуреһим өткүрниң ханими хәлчихан ханим вә пәрзәнтлири қатнашқандин сирт йәнә қумул зиялийлири, язғучи шаирлар иштирак қилип, язғучиға атиған шеирлирини декламатсийә қилди. Өсмүрләр коллектип шеир декламатсийә қилди. Хәттатлар шаирниң надир шеирлирини таллап вә өзлириниң әсәрлирини чоң ләвһә шәклидә йезип чиқип ресторан тамлириға асти. Җамаәт абдуреһим өткүрниң ханимиға мәхсус тон вә доппа тәқдим қилған.

Абдуреһим өткүр вапатиниң 20 йиллиқи мунасивити билән уйғур тор бәтлиридиму әслимиләр вә униң иҗадийитигә беғишланған мақалиләр елан қилинди.
Абдуреһим өткүр 1995-йили,10-айниң 5-күни үрүмчидә вапат болған иди.

Әдәбиятшунаслар а. Өткүрниң «ойғанған земин», «из» намлиқ романлири арқилиқ уйғурларни өзлириниң 20-әсир тарихи паҗиәлириниң сәвәблири һәққидә ойлинишқа үндигәнлики вә «мән ақ байрақ әмәс», «из» шеирлири арқилиқ уйғур милләтпәрвәрлириниң тиз пүкмәс роһини йәнә бир қетим җакарлап, йеңи әвладқа күч беғишлиди дәп баһа бәрди.

Абдуреһим өткүрниң бир қисим әсәрлири, рус, инглиз, түрк, хитай вә башқа тилларғиму тәрҗимә қилинип нәсир қилинди.
Мәлум болушичә, түркийәдиму йеқинда абдуреһим өткүр вапатини хатириләш вә униң иҗадий һаяти бойичә илмий муһакимә өткүзүшни пилан қилинған икән.

Толуқ бәт