Alimedin pa'aliyetchigiche: maysem mutellipowaning hayat kechürmishliri (2)

Muxbirimiz eziz
2019-07-04
Élxet
Pikir
Share
Print
Alime maysem mutellipowa xanim xarward uniwérsitétida yalghuz kishilik namayishni dawam qilmaqta.
Alime maysem mutellipowa xanim xarward uniwérsitétida yalghuz kishilik namayishni dawam qilmaqta.
RFA/Eziz

Almuta shehirige anche yiraq bolmighan ghaljat rayonidiki Uyghur mehelliside rusche mektepte oqughinigha qarimay Uyghurluq kimlikige toyunup chong bolghan maysem mutellipowa özining toxtawsiz tirishchanliqi bilen 1995-yili moskwada tébbiy penler boyiche doktorluq unwani aldi. Uning bu mezgilde chashqanni asas qilghan halda ghol hüjeyre sahesige chongqurlap kirishi uning kéyinki yili amérikaning wiskansin uniwérsitétigha kélip mozayni klonlash sahesi boyiche ishlishige yol achti shundaqla u mushu sahede utuq qazan'ghan tunji shexs bolup qaldi.

Shu netijidin kéyin maysemning ilim-pen sahesidiki xizmitige yollar daghdam échildi hemde 2005-yili amérikidiki eng dangliq aliy mekteplerning biri bolghan masachusséts téxnologiye instituti (MIT) qarmiqidiki ghol hüjeyre tetqiqat merkizige xizmetke qobul qilindi. U bu yerde öz kespige da'ir köpligen ilmiy maqalilerni yazdi hemde ularni xelq'aradiki dangliq tebi'iy pen zhurnallirida élan qildi. Kéyinche mezkur merkezning diréktorluqini üstige aldi. Emma "On külkining bir yighisi bar" dégendek uning xizmettiki ghelibilirige we utuqlirigha jör bolup kéliwatqan anisi axiri parkinson késilidin saqiyalmay maysemning étikide jan üzdi.

Emma anisining ölümi maysemning Uyghurluq rishtini üzüp qoymidi. U özining Uyghurluq eksini boston shehiridiki Uyghur jama'iti bilen bolghan alaqe dunyasidin tépip keldi shundaqla hazirghiche Uyghur jama'itidin ayrilmay özini shularning bir parchisi, dep qarap keldi.

Maysemning xizmettiki utuqliri we salahiyiti uninggha gherb dunyasidiki rahet-paraghetlik turmushqa intilgüchi herqandaq kishi arzu qilidighan barche shara'itlarni yaritip bergen idi. Emma Uyghur dostliridin ularning ata-aniliri, aka-singilliri yaki bashqa uruq-tughqanlirining yighiwélish lagérlirigha qamalghanliqi, Uyghurlar diyaridiki siyasiy basturushning xilmu-xil ipadiliri heqqide türlük xewerlerni anglighanda maysem özining rahetlik turmushidin rahet hés qilalmidi.

"Kalining münggüzige ursa tuwiqi sirqiraptu" dégendek Uyghurlarning béshigha kéliwatqan bir-biridin éghir paji'eler maysemning yürikini ezdi. Közi uyqudin bidar boldi. Ichi siqilghanliqtin u némila bolmisun bir ish qilish kérek, dep oylidi. Del mushu sewebtin u bilip-bilmeyla pa'aliyetchige aylinip qaldi.

Bu jeryanda u dolqun eysa, roshen abbas, zubeyre shemshidin qatarliq Uyghur pa'aliyetchiler bilen köp qétimlap uchrashqanda ularning özige qanchilik ilham we medet bergenlikinimu zoq-shox bilen sözlep ötti.

Maysemning ötken ikki heptidin buyan ay-yultuzluq kök bayraqni kötürginiche xarward uniwérsitétida qiliwatqan yalghuz kishilik namayishi, Uyghurlar diyarining hazirqi siyasiy weziyiti eks ettürülgen chong tiptiki süretlik elbumni xarward meydanidiki kishilerge sunushi dégenler köpchilikni qiziqturghachqa söhbitimizde bumu muhim témilardin boldi. Bu heqte söz bolghanda maysem özining bostondiki Uyghurlardin abduwaris ablimitning yéqindin yardemde bolushi bilen bu namayishni dawam qiliwatqanliqini sözlep kélip, namayishni lagér taqalghiche dawam qilidighanliqini bildürdi.

Maysemning bildürüshiche u özining yalghuz kishilik namayishini dawam qildurghandin buyan buning özige chushluq ünümi bolmaqta iken. Bolupmu bir qisim amérika puqralirining Uyghurlargha hésdashliq qilishi we qollishini qolgha keltürüshke paydiliq bolmaqta iken.

Biz axirida "Bu xildiki pa'aliyetlerning xizmet we tetqiqat ishlirigha dexli yetküzüp qoyushidin ensiremsiz?" dep sorighanda özining hemmidinmu bekrek kéyinki Uyghur ewladlirigha yüz kélelmeydighan bir Uyghur alimesi bolup qélishtin bekrek ensireydighanliqini bildürdi.

Maysemning yalghuz kishilik namayishi dawam qilmaqta, u kötürgen ay-yultuzluq kök bayraq her heptining axirida xarward meydanida lerzan yelpünüp, ötken-kechkenlerge Uyghurning qismitini anglatmaqta. Biz uninggha téximu zor utuqlarni tilep ziyaritimizni axirlashturduq.

Toluq bet